თბილისის მერი გიგი უგულავა რუსთაველის გამზირზე, 9 აპრილის მემორიალთან მივიდა და გარდაცვლილთა ხსოვნას პატივი მიაგო.
როგორც მან განაცხადა, ეს არის სიმბოლური დღე და სიმბოლო იმისა, რომ ჩვენი ქვეყნის დამოუკიდებლობისთვის ბრძოლაა საჭირო.
მისი თქმით, პირველი უმანკო სისხლი სწორედ რუსთაველის გამზირზე, 9 აპრილს დაიღვარა.
"შემდეგ იყო დამოუკიდებლობის გამოცხადების დღე, მაგრამ ჩემი აზრით, დღეს არის მთავარი სხვა რამ. მთავარი არის ის, რომ ეს დღე არ უნდა იყოს წარსული დღე. ეს უნდა იყოს მომავლის დღე და თითოეული ქართველისთვის სამაგალითო დღე", - განაცხადა უგულავამ.
დღეს, 1989 წლის 9 აპრილის ტრაგედიიდან 24 წელი შესრულდა. 9 აპრილის მემორიალთან დაღუპულთა ოჯახის წევრები, ახლობლები და პოლიტიკოსები დილის 04:00 საათიდან იკრიბებიან. შესრულდა გარდაცვლილთა სულის მოსახსენებელი პანაშვიდიც.