ენერგეტიკის მინისტრის კახა კალაძის განცხადებით, ნესკრას ჰესის პროექტზე მუშაობა არ შეჩერებულა.
როგორც მან საპარლამენტო უმცირესობასთან შეხვედრისას აღნიშნა, ნახამვანზე არ არსებობდა პროექტის სრული ტექნიკურ-ეკონომიკური დათვლები და იყო საბჭოთა კავშირის დროიდან მოყოლებული პროექტი.
"პროექტს რაც შეეხება ძალიან მნიშვნელოვანია და მე მაგ პროექტის განხორციელებას მივესალმები და არა მარტო მაგ პროექტის, არამედ ზოგადად ახალი ჰიდროელექტროსადგურების მშენებლობას. ეს ჩვენთვის ძალიან მნიშვნელოვანია და მაქსიმალურად უნდა ვეცადოთ გამოვიყენოთ ის რესურსები, რომელიც ქვეყანას გააჩნია - 65-70% აუთვისებელი გვაქვს ეს რესურსები", - განაცხადა კალაძემ.
მისივე თქმით, კომპანიები ნესკრას მშენებლობის საკითხით არიან დაინტერესებული.
"არიან კომპანიები, რომლებიც ამ ჰიდროელექტროსადგურის გაკეთებით არიან დაინტერესებული და რატომ გგონიათ რომ გაჩერებულია ყველაფერი? არაფერია გაჩერებული. მიმდინარეობს მუშაობა", - აღნიშნა მინისტრმა.
მისივე თქმით, მსგავსი პროექტების განხორციელება ჩვენი ქვეყნის ენერგო დამოუკიდებლობისა და ენერგო უსაფრთხოებისთვის ძალიან მნიშვნელოვანია.
