ბრაზილიაში საგარეო საქმეთა მინისტრ მაია ფანჯიკიძის ოფიციალური ვიზიტი დასრულდა.
როგორც ფანჯიკიძემ აღნიშნა, ბრაზილიური მხარე დაინტერესებულია ეკონომიკური და კულტურული ურთიერთობების გაღრმავებით.
მისი თქმით, საქართველოში სტუმრობის სურვილი არა მხოლოდ საგარეო საქმეთა მინისტრმა, არამედ ბრაზილიის კულტურის მინისტრმაც გამოთქვა.
"საბოლოო ჯამში, შემიძლია ვთქვა, რომ ეს იყო ძალიან ნაყოფიერი ვიზიტი და მე დარწმუნებული ვარ, რომ ის ძალიან შეუწყობს ხელს ორ ქვეყანას შორის ურთიერთობების გაღრმავებას", - განაცხადა მაია ფანჯიკიძემ.
საგარეო საქმეთა მინისტრი ბრაზილიაში 3 აპრილს გაემგზავრა. ვიზიტის ფარგლებში, მაია ფანჯიკიძემ შეხვედრა ბრაზილიელ კოლეგასთან, კულტურის მინისტრთან, დეპუტატთა პალატის ვიცე-პრეზიდენტთან და მეგობართა ჯგუფის წევრებთან გამართა.
აუდიენციის დროს მხარეებმა ორ ქვეყანას შორის ურთიერთობების სამომავლო პერსპექტივები განიხილეს. ისაუბრეს ქვეყნებს შორის ვაჭრობის, ეკონომიკის, კულტურის და სოფლის მეურნეობის სფეროებში სამომავლო თანამშრომლობის გზებზე.