2013 წლის მარტიდან „საქპატენტი" ასოცირებული წევრის სტატუსით საერთაშორისო არასამთავრობო ორგანიზაცია „ორიჯინს" (oriGIn - The Organization for an International Geographical Indications Network) მიუერთდა. „ორიჯინი" (oriGIn) წარმოადგენს არასამთავრობო არასამეწარმეო ორგანიზაციას - გეოგრაფიული აღნიშვნების საერთაშორისო ქსელს, რომლის სათაო ოფისიც ჟენევაში მდებარეობს. ეს ორგანიზაცია აერთიანებს გეოგრაფიული აღნიშვნებისა და ადგილწარმოშობის დასახელებების დარგში მოღვაწე დაახლ. 350 ასოციაციას 40-მდე სახელმწიფოდან. მისი მიზნებია: გეოგრაფიული აღნიშვნების უფრო ეფექტური დაცვა და ამ თემაზე ცნობიერების ამაღლება ადგილობრივ, რეგიონალურ და საერთაშორისო დონეზე; ასევე გეოგრაფიული აღნიშვნების, როგორც საშუალების ხელშეწყობა ადგილობრივი მწარმოებლებისა და თემების მდგრადი განვითარებისათვის. მოცემული არასამთავრობო ორგანიზაციის წევრები შეიძლება გახდნენ როგორც ადგილობრივი მწარმოებლები, ისე გეორგაფიული აღნიშვნების მიმართულებით მოღვაწე სახელმწიფო უწყებები, რომლებიც იზიარებენ oriGIn-ის მიზნებს. საქპატენტი, როგორც „ორიჯინის" ასოცირებული წევრი მონაწილეობას მიიღებს ამ ორგანიზაციის აქტოვობებში, საერთაშორისო დონეზე ქართული გეოგრაფიული აღნიშვნებისა და ადგილწარმოშობის დასახელებების უფრო ეფექტური დაცვისა და პოპულარიზაციის უზრუნველსაყოფად.