საჯარო სამსახურში მუშაობის ზღვრული ასაკი 65 წლით აღარ იქნება. როგორც საკანონმდებლო მაცნეში გამოქვეყნებულ პრეზიდენტ მიხეილ სააკაშვილის მიერ ხელმოწერილ დადგენილებაშია აღნიშნული, "საჯარო სამსახურის შესახებ" კანონში ცვლილებები შედის.
ცვლილების თანახმად, კანონში არსებული 50-ე - მოსამსახურის საპენსიო უზრუნველყოფასთან დაკავშირებული მუხლი შეიცვალა და ამიერიდან, მოსამსახურე პენსიაში გადის საქართველოს კანონმდებლობით დადგენილი წესით.
ცვლილებამდე, აღნიშნული მუხლით, სამსახურში ყოფნის ზღვრული ასაკი განისაზღვრება 65 წლით. მოსამსახურე პენსიაში გადის კანონმდებლობით დადგენილი წესით.
გარდა ამისა, "საჯარო სამსახურის შესახებ" საქართველოს კანონის 101-ე მუხლი მთლიანად ამოღებულია.
აღნიშნული მუხლის თანახმად კი, მოხელე შეიძლებოდა, სამსახურიდან ასაკის გამო გათავისუფლებულიყო.
როგორც საკანონმდებლო მაცნეშია აღნიშნული, "საჯარო სამსახურის შესახებ" კანონის 108-ე მუხლის პირველი პუნქტი შემდეგი რედაქციით ჩამოყალიბდეს:
"მოხელეს 1 თვით ადრე უნდა ეცნობოს დაწესებულების ლიკვიდაციის, თანამდებობის შემცირების ან ატესტაციის არადამაკმაყოფილებელი შედეგების გამო სამსახურიდან განთავისუფლების შესახებ. ხანგრძლივი შრომისუუნარობის გამო განთავისუფლების შესახებ მოხელეს წერილობით უნდა ეცნობოს განთავისუფლებამდე 2 კვირით ადრე მაინც".
111-ე მუხლის პირველი პუნქტის თანახმად კი, მოხელე არ შეიძლება განთავისუფლებულ იქნეს სამსახურიდან შტატების შემცირების ან ატესტაციის შედეგების გამო იმ დროის განმავლობაში, როდესაც მისი სამსახურებრივი ურთიერთობები შეჩერებულია: ანაზღაურებად შვებულებაში ყოფნისას; სავალდებულო სამხედრო სამსახურში გაწვევის, სასწავლო შეკრების, რეზერვისტთა მობილიზაციის დროს; საპრეზიდენტო ან წარმომადგენლობითი ორგანოების არჩევნებში კანდიდატად წამოყენებისას, გარდა კანონით გათვალისწინებული შემთხვევებისა".
