მცირე და საშუალო კომპანიების პრობლემებზე ამიერიდან მცირე და საშუალო ბიზნესის პალატა იზრუნებს, რომელიც სავაჭრო-სამრეწველო პალატის ეგიდით უკვე შეიქმნა. უკვე ცნობილია, რომ პალატას მცირე და საშუალო საწარმოთა ასოციაციის დირექტორი კახა კოხრეიძე უხელმძღვანელებს.
კოხრეიძის განმარტებით, მცირე და საშუალო ბიზნესის პალატის წევრობა ყველას შეეძლება. მანვე მეწარმეებს მოუწოდა აქტიურად ითანამშრომლონ სავაჭრო-სამრეწველო პალატასთან.
"მცირე და საშუალო ბიზნესის პალატა საქართველოს სავაჭრო-სამრეწველო პალატის ეგიდით იქმნება. პალატა კონცენტრირებას გააკეთებს რამდენიმე მიმართულებით. პირველი იქნება ზოგადად ბიზნეს-კულტურის ამაღლება, რათა რაც შეიძლება მეტი ადამიანი გახდეს მეწარმე. ძალიან ბევრი ჩვენი მოქალაქე უმუშევარია, ეძებს სამსახურს და ამიტომ გვსურს, წავახალსოთ ისინი. პარალელურად, ჩვენი ერთ-ერთი მნიშვნელოვანი მიმართულება იქნება ბიზნეს-ინკუბატორების იგივე პარკების საკითხი, რომელიც სხვადასხვა კუთხით იმუშავებს. ეს ხელს შეუწყობს ძალიან მცირე ზომის კომპანიების გამსხვილებას, რაც კარგია საბაზრო ორიენტაციისთვის. ასევე გვსურს, დავამუშავოთ მენტორების პროგრამა. ეს ადამიანები განთავსდებიან რეგიონებში და კონსულტაციას გაუწევენ მცირე და საშუალო მეწარმეებს, რათა მათ სწორად დასახონ მიზნები, დახვეწონ ფინანსური მენეჯმენტი და ა.შ. და გარდაიქმნან ინტერნაციონალურ კომპანიებად", - განმარტა კოხრეიძემ.
მისივე განცხადებით, მცირე და საშუალო ბიზნესის ერთ-ერთი მთავარი მიმართულება არბიტრაჟი და დავების საკითხი იქნება.
