სახალხო დამცველმა უჩა ნანუაშვილმა რუსთავის #5 ქალთა სასჯელაღსრულების დაწესებულებაში ოსი ეროვნების პატიმრები დიანა ჯიკაევი და ცირა მგელაძე (გუჩმაზოვი) მოინახულა.
სახალხო დამცველის აპარატის ინფორმაციით, მსჯავრდებულებმა დ. ჯიკაევმა და ც. მგელაძემ სახალხო დამცველს მიმართეს, რათა მან მათი საქმეები ინდივიდუალურად შეისწავლოს და პატიმართა გაცვლის პროცესში მათი საკითხი დააყენოს.
შეხვედრისას მსჯავრდებულებმა სახალხო დამცველსსაკუთარი საქმის მასალები და ის პრობლემები გააცნეს, რაც მათ საქართველოს ტერიტორიაზე თავისუფლების აღკვეთის გამო შეექმნათ.
სახალხო დამცველს მიაჩნია, რომ დიანა ჯიკაევისა და ცირა მგელაძის (გუჩმაზოვი) საქმეების დეტალური შესწავლა, საქმის განსაჯაროება და პატიმართა გაცვლის პროცესში მათი ცხინვალის დე-ფაქტო ხელისუფლებისთვის გადაცემის საკითხის განხილვა აუცილებელია.
დ. ჯიკაევის განცხადებით, ის სამხრეთ ოსეთის მოქალაქეა. 2007 წელს უშიშროების სამსახურმა ის დიდი ლიახვის ხეობის სოფელ ქურთაში იძულებით გადმოიყვანა, ხოლო 2008 წლის ომის შემდეგ თბილისში, სამხრეთ ოსეთის დროებითი ადმინისტრაციის ჯანდაცვისა და სოციალური უზრუნველყოფის დეპარტამენტში დირექტორის თანაშემწედ მუშაობდა. ჯიკაევი 2012 წლის 8 თებერვალს დააკავეს.
მსჯავრდებული ცირა მგელაძე (გუჩმაზოვი) სასჯელს 2011 წლის 20 მაისიდან, სისხლის სამართლის კოდექსის 319-ე მუხლით (უცხო ქვეყნისთვის, უცხოეთის ორგანიზაციისთვის ან უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარება) იხდის.
