ვიზიტის ფორმატში რეგიონალური ელექტროგადაცემის გაუმჯობესების პროექტის განხორციელებისთვის ხელი მოეწერა ხელშეკრულების, რომელიც ითვალისწინებს ADB-ს მიერ „ელექტროგადაცემის გაუმჯობესების პროექტისთვის" დაახლოებით 48 მლნ აშშ დოლარის ოდენობის ფინანსური რესურსის გამოყოფას.
ხელშეკრულებას ხელი მოაწერეს საქართველოს ფინანსთა მინისტრმა, აზიის განვითარების ბანკის მმართველთა საბჭოს თავმჯდომარის მოადგილემ, ნოდარ ხადურმა და აზიის განვითარების ბანკის ვიცე-პრეზიდენტმა, სიაო ჟაომ. ხელმოწერის ცერემონიას დაესწრო ენერგეტიკისა და ბუნებრივი რესურსების მინისტრი, კახა კალაძე.
პროექტის მიზანია საქართველოში ელექტროენერგიის გადაცემის სისტემის ინფრასტრუქტურის შემდგომი გაუმჯობესება და განვითარება, მისი საიმედო, სტაბილური და ეფექტური ფუნქციონირების უზრუნველყოფა. ასევე, ელექტროენერგიის გადაცემის მოცულობის გაზრდის, ექსპორტისა და ტრანზიტის ხელშეწყობა. ამ მიზნით დაგეგმილია არსებული ქვესადგურების რეაბილიტაცია და ასევე ახალი 220/110 კვ. ქვესადგურის მშენებლობა.

„საქართველო წარმატებით თანამშრომლობს აზიის განვითარების ბანკთან. ADB მონაწილეობს რამდენიმე ინფრასტრუქტურული პროექტის განხორციელებაში. ასევე გზების, წყალმომარაგების სისტემების რეაბილიტაციაზე. ბანკის მხრიდან დიდია ინტერესი ენერგოსექტორის მიმართ, რომელიც ჩვენთვის ერთ-ერთი პრიორიტეტული სფეროა. ხელმოწერილი ხელშეკრულება ითვალისწინებს ფინანსური რესურსების გამოყოფას, რათა ქვეყანაში მოხდეს მნიშვნელოვანი ენერგოობიექტების რეაბილიტაცია-მშენებლობა," - განაცხადა საქართველოს ფინანსთა მინისტრმა, აზიის განვითარების ბანკის მმართველთა საბჭოს თავმჯდომარის მოადგილემ, ნოდარ ხადურმა.

„დღეს ხელი მოვაწერეთ საქართველოს მთავრობისთვის მნიშვნელოვანი პროექტის დაფინანსების ხელშეკრულებას. იგი წაადგება თქვენი ქვეყნის განვითარებას. დარწმუნებული ვარ საქართველოს მთავრობის შესაძლებლობებში. ვფიქრობ, ეს კიდევ ერთი წარმატებული პროექტი იქნება, რითაც დადასტურდება, რამდენად კარგად იყენებს საქართველოს ხელისუფლება საერთაშორისო საფინანსო ინსტიტუტების მიერ გამოყოფილ ფინანსურ რესურსებს," - განაცხადა აზიის განვითარების ბანკის ვიცე-პრეზიდენტმა სიაო ჟაომ.

„ძალიან მნიშვნელოვანი პროექტია ჩვენი ქვეყნის ენერგო-განვითარებისა და ენერგო-უსაფრთხოებისთვის. გამოყოფილი ფინანსური რესურსით ავაშებეთ ქვესადგურს „ხორგა-ჯვარი," თანხები ასევე მოხმარდება ზოგადად, რეგიონისთვის მნიშვნელოვან ენერგოპროექტებს, რომლებიც საშუალებას მოგვცემს განვავითაროთ ენერგოსექტორი და მთლიანად, ქვეყნის ეკონომიკა," - აღნიშნა ენერგეტიკისა და ბუნებრივი რესურსების მინისტრმა კახა კალაძემ.

პროექტის განხორციელების შედეგად გაუმჯობესდება სისტემის მდგრადობა და ელექტროენერგიის მიწოდება. პროექტი აგრეთვე ხელს შეუწყობს ელექტროენერგიის ექსპორტისა და ტრანზიტისთვის საჭირო ინფრასტრუქტურის განვითარებას.

პროექტს განახორციელებს საქართველოს ენერგეტიკისა და ბუნებრივი რესურსების სამინისტრო და სს „საქართველოს სახელმწიფო ელექტროსისტემა. პროექტის დასრულება დაგეგმილია 2016 წელს.

საქართველო აზიის განვითარების ბანკთან 2007 წლიდან თანამშრომლობს. ADB-ი საქართველოს ერთ-ერთი მნიშვნელოვანი პარტნიორი საერთაშორისო საფინანსო ორგანიზაციაა. დღეის მდგომარეობით, ADB-ს საქართველოში დაფინანსებული აქვს პროექტები დაახლოებით 865 მლნ აშშ დოლარის ღირებულების, აქედან 250 მლნ აშშ დოლარის საბიუჯეტო მხარდაჭერა. მიმდინარე პროექტების ჯამური ღირებულება დაახლოებით 578.5 მლნ აშშ დოლარია.