საქართველოს ფინანსთა მინისტრმა, ნოდარ ხადურმა შეხვედრა გამართა პოლონური საინფორმაციო ტექნოლოგიების კომპანია „Asseco Group"-ის წარმომადგენლებთან.
საქართველოში კომპანიის წარმომადგენელთა ჩამოსვლის მიზანია, საინფორმაციო ტექნოლოგიების მიმართულებით ქვეყანაში არსებული საინვესტიციო გარემოს გაცნობა, გამოცდილების გაზიარება, პარტნიორების მოძიება, როგორც სახელმწიფო ისე კერძო სექტორში.
„კომპანია „Asseco Group"-ის სურვილია ინვესტიციები განახორციელონ საქართველოში და მოიძიონ პარტნიორები ჩვენს ქვეყანაში. ეს ერთ-ერთი მსხვილი IT კომპანიაა აღმოსავლეთ და ცენტრალურ ევროპაში, რომელიც მუშაობს პროგრამულ უზრუნველყოფაზე. აქვთ საინტერესო სტრატეგია, რომელიც სურთ გაუზიარონ კერძო კომპანიებს. რაც შეეხება სახელმწიფო სტრუქტურებთან თანამშრომლობას, ჩვენი ამოცანაა, მაქსიმალურად გამოვიყენოთ თანამედროვე ტექნოლოგიები, განვიხილოთ მათი პროგრამული უზრუნველყოფის საკითხები, თუმცა კონკრეტული გადაწყვეტილებები მიიღება მხოლოდ მოქმედი კანონმდებლობის შესაბამისად," - განაცხადა ფინანსთა მინისტრმა, ნოდარ ხადურმა.
„ეს ჩვენი პირველი ვიზიტია საქართველოში. კომპანიას აქვს პროგრამული უზრუნველყოფის კარგი გამოცდილება ეკონომიკის სხვადასხვა დარგისთვის. საქართველოში ჩამოვედით საინვესტიციო გარემოს გასაცნობად და პოტენციური პარტნიორების მოსაძიებლად. ველით, რომ თანამშრომლობის სურვილს გამოთქვამენ როგორც კერძო კომპანიები, ასევე სახელმწიფო უწყებები," - განაცხადა კომპანია Asseco Group-ის წარმომადგენელმა პრჟემისლავ შესკოვსკიმ.
კომპანია „Asseco Group წარმატებით მუშაობს ევროპული ქვეყნების უმრავლესობაში, ასევე ისრალესში, აშშ-ში, იაპონიასა და კანადაში. მათი პროფილი მოიცავს საბანკო და სადაზღვევო სისტემებს, ასევე სახელმწიფო დაწესებულებებს.