დღეს, 20 მარტს, აშშ-ის პრეზიდენტი ბარაკ ობამა ისრაელს ეწვევა. ისრაელში ვიზიტის ფარგლებში იგი მოლაპარაკებებს გამართავს ქვეყნის პრემიერ-მინისტრთან ბენიამენ ნეთანიაღუსთან და ისრაელის პრეზიდენტთან შიმონ პერესთან.
ანალიტიკოსები ვარაუდობენ, რომ ორი ქვეყნის ლიდერების მოლაპარაკებების მთავარი თემა ირანის ირგვლივ შექმნილი ვითარება და ახლო აღმოსავლეთში არსებული დაპირისპირებების დარეგულირება იქნება.
ისრაელში ვიზიტამდე ორი დღით ადრე აშშ-ის პრეზიდენტმა ბარაკ ობამამ მოუწოდა ირანს დაუყონებლივ გადადგას დამარწმუნებელი ნაბიჯები ქვეყნის ბირთვულ პროგრამაზე შეთანხმების მისაღწევად. ვიდეომიმართვაში ნოვრუზის დღესასწაულთან დაკავშირებით, ობამამ განაცხადა, რომ თუ ირანი გადადგამს დამარწმუნებელ ნაბიჯებს, ირანელი ხალხი ნახავს აშშ-სთან და სხვა ერებთან სავაჭრო ურთიერთობების უპირატესობას.
გასულ კვირას ობამამ კვლავ განაცხადა, რომ ირანს ბირთვული იარაღის შექმნის უფლებას არ მისცემს და დასძინა, რომ ამ პრობლემის მოსაგვარებლად უმთავრესია თეირანზე დიპლომატიური ზეწოლის გაძლიერება.
თავის მხრივ ისრაელის პრემიერ-მინისტრი ბენიამინ ნეთანიაღუ აცხადებს, რომ ირანი ახლოსაა "წითელი ზოლის" გადალახვასთან და ბირთვული იარაღის შექმნასთან. მან არ გამორიცხა, რომ ისრაელმა ირანზე პრევენტიული დარტყმები განახორციელოს.