არასამთავრობო ორგანიზაცია "ჩემი საქართველოს" თავმჯდომარე ელისო კილაძე მიიჩნევს, რომ შს მინისტრი ირაკლი ღარიბაშვილი შეცდომაშია შეყვანილი.
როგორც კილაძის მიერ გავრცელებულ განცხადებაშია აღნიშნული, 2006 წლის 23 თებერვალს ვარციხეში ჩატარდა სპეცოპერაცია, რომელსაც იმერეთის შს მთავარი სამმართველოს უფროსი ლევან კახიანი ხელმძღვანელობდა.
განცხადების თანახმად, სპეცოპერაციის დროს სამი პირის - ბუთხუზ კიზირიას, ვალერი ბენდელიანისა და ზაურ ბაბუხადიას ლიკვიდაცია მოხდა.
"ტაქსის მძღოლი, რომელსაც ბიჭები გადაჰყავდა, აცხადებს, რომ მის მგზავრებს იარაღი არ ჰქონდათ. არსებობს ექსპერტიზის დასკვნა, სადაც ცხადად წერია, რომ გარდაცვლილების ტანსაცმელზე მეტალის შეხების კვალი არ არის. ლევან კახიანი დღეს დანიშნულია შს სამინისტროს ანტიტერორიტული ცენტრის უფროსის მოადგილედ, ხოლო მინისტრი ღარიბაშვილი აცხადებს, რომ დახოცილი ბიჭები კრიმინალები არიან", - აღნიშნულია განცხადებაში.
ელისო კილაძის თქმით, შს სამინისტროს საზოგადოებასთან ურთიერთობის სამსახურის უფროსთან ნინო გიორგობიანთან დაკავშირებას ამ დრომდე უძედეგოდ ცდილობს, რათა მინისტრს ფირი და ის ინფორმაცია გადასცეს, რომელიც წლების განმავლობაში ჟურნალისტებმა შეაგროვეს.
კილაძის განცხადებით, ირაკლი ღარიბაშვილს აღნიშნული მასალების გაცნობის შემდეგ ბოდიშის მოხდა მოუწევს.