მიუხედავად გაეროს მოქმედი ემბარგოსი, ირანიდან იარაღი სირიაში ერაყის გავლით მაინც ხვდება. ამ მოსაზრებას დასავლური ქვეყნების დიპლომატები გამოთქვამენ. მათივე აზრით, სირიიდან იარაღი თურქეთის და ლიბანის მეშვეობითაც ხვდება, თუმცა ამ ქვეყნების ოფიციალური პირები ამ ინფორმაციას კატეგორიულად უარყოფენ.
დასავლელი დიპლომატების განცხადებით, ირანის ხელისუფლებამ ბაშარ ასადის შეიარაღებული ძალებს მხარდაჭერა უფრო გააქტიურა, რათა სირიის სახელისუფლო ძალებს უპირატესობის მოპოვების საშუალება მიეცეთ. მოხსენების თანახმად, ირანი სამხედროების გადასაყვანად და დიდი ოდენობით იარაღის გადასატანად, სამოქალაქო თვითმფრინავებს იყენებს, რომლებიც ერაყის საჰაერო სივრცეს უპრობლემოდ კვეთენ.
თავის მხრივ, ირანი ირწმუნება, რომ ასადის ხელისუფლება ისედაც კარგადაა შეიარაღებული და მას ირანის მხარდაჭერა არ სჭირდება. სირიის ხელისუფლებისთვის იარაღის სხვა მსხვილ მიმწოდებლად რუსეთიც სახელდება. კრემლი კი აცხადებს, რომ ის სირიას ჰაერსაწინააღმდეგო საშუალებებით დაეხმარა, რაც არა თავდასხმისთვის, არამედ, თავდაცვისთვისაა საჭირო.