საქართველოს ფინანსთა მინისტრმა, ნოდარ ხადურმა რეგიონებში დაგეგმილი შეხვედრების ფარგლებში 14 მარტს სამუშაო შეხვედრები გამართა ფოთში, სადაც გაეცნო რეგიონში მიმდინარე ინფრასტრუქტურულ პროექტებს, ფინანსთა სამინისტროს სამსახურების მუშაობას და შეხვდა ადგილობრივ ხელისუფლებას.
ფინანსთა მინისტრ ნოდარ ხადურთან ერთად შეხვედრებში მონაწილეობა მიიღო ფოთის მაჟორიტარმა დეპუტატმა ეკა ბესელიამ, ფინანსთა სამინისტროს შემოსავლების სამსახურის უფროსმა ლაშა ხუციშვილმა, მომსახურების სააგენტოს გენერალურმა დირექტორმა გიორგი ჯავახიშვილმა, ქ.ფოთის მერმა დავით სარსანიამ.
ფინანსთა მინისტრმა შეხვედრა გამართა ქ.ფოთის მერიაში. მაჟორიტარ დეპუტატთან ერთად დაათვალიერა ფოთის თეატრი, რომლის მშენებლობა წელს სახელმწიფო პროგრამით სრულდება, ასევე, ფოთის სპორტკომპლექსის სამშენებლო სამუშაოები, სტადიონი „კოლხეთი" და ზღვის სანაპირო ზოლი.
,,ჩემი დღევანდელი ჩამოსვლა ფოთში ემსახურება იმას, რომ უშუალოდ გავეცნო იმ პრობლემებს, რომელიც ქალაქის წინაშე დგას. სამწუხაროა, რომ ქალაქის ინფრასტრუქტურა და მეურნეობა დღეს პრაქტიკულად მოშლილია. პრობლემებია წყალმომარაგებაში, სანიაღვრე სისტემებში, ქალაქის გზებში. ქალაქში ბევრი პრობლემა დაგროვდა და ჩვენ, ცენტრალური ხელისუფლება ქალაქის მმართველობასთან ერთად, ბევრ სერიოზულ ნაბიჯებს გადავდგამთ იმისთვის, რათა ეს პრობლემები მოვაგვაროთ. მნიშვნელოვანია, რომ ჩვენთან ერთად პრაქტიკულად ყოველდღიურ რეჟიმში მუშაობს ქალაქის მაჟორიტარი დეპუტატი ეკა ბესელია, რათა ფოთის პრობლემები როგორც ადგილობრივმა ისე ცენტრალურმა ხელისუფლებამ ერთობლივად გადაჭრას"- განაცხადა ფინანსთა მინისტრმა.
ფინანსთა მინისტრმა ნოდარ ხადურმა და მომსახურების სააგენტოს გენერალურმა დირექტორმა გიორგი ჯავახიშვილმა ფოთში ახალი საბითუმო/საცალო მაღაზია გახსნეს, სადაც ხელმისაწვდომ ფასად გაიყიდება ტანსაცმელი, სამეურნეო და საყოფაცხოვრებო საქონელი. აღნიშნულ ობიექტზე ადგილობრივები დასაქმდნენ.
ეს უკვე მომსახურების სააგენტოს რიგით მეხუთე სავაჭრო ობიექტია. ახალი მაღაზიების გახსნას, მათ შორის, რეგიონებში, განაპირობებს მომხმარებელთა დიდი ინტერესი, მაღალი ხარისხი და დაბალი ფასები.
ფინანსთა მინისტრმა შეხვედრები გამართა ფოთის პორტში, შეხვდა ფოთის საბაჟოს და „გეზ"-ის, შემოსავლების სამსახურის სერვის ცენტრის, ასევე, საგამოძიებო სამსახურის ფოთის რეგიონალური სამმართველოს თანამშრომლებს.
,,ძალიან იმედიანად ვტოვებ ფოთს. ჩვენი სამსახურები მუშაობენ გამართულად. კარგი ტენდენციაა, მათ შორის ექსპორტ-იმპორტის თვალსაზრისით, რაც იმას ნიშნავს, რომ კურსი, პოლიტიკა, რომელიც ახალ მთავრობას აქვს არის სწორი. საზოგადოებაში კარგი მოლოდინია და ეს მოლოდინი რეალობად გადაიქცევა" - განაცხადა ფინანსთა მინისტრმა ნოდარ ხადურმა ფოთში შეხვედრების დასრულების შემდეგ.
