საზოგადოებრივი მაუწყებლის გენერალური დირექტორის ვაკანტური თანამდებობის დასაკავებლად გამოცხადებულ კონკურსზე განაცხადების შეტანის ვადა დღეს, 18:00 საათზე იწურება.
საზოგადოებრივი მაუწყებლის ვებ-გვერდზე ამ დროისთვის 23 განაცხადია დარეგისტრირებული.
ამასთან, მაუწყებლის თანამშრომელთა ნაწილის საინიციატივო ჯგუფი დირექტორის პოსტზე გამოცხადებული კონკურსის შეჩერებას მოითხოვს. წინააღმდეგ შემთხვევაში, პოსტზე განაცხადების მიღების პროცესის ჩაშლას გეგმავს.
პარალელურად, საინიციატივო ჯგუფის წარმომადგენლები სასამართლოს გადაწყვეტილებასაც ელოდებიან. სასამართლომ კი, ყოფილი გენერალური დირექტორის გიორგი ბარათაშვილის თანამდებობიდან მოხსნის შესახებ სამეთვალყურეო საბჭოს გადაწყვეტილებისა და დირექტორის პოსტზე გამოცხადებული კონკურსის კანონიერების საკითხზე უნდა იმსჯელოს.
გიორგი ბარათაშვილი საზოგადოებრივი მაუწყებლის ბორდმა თანამდებობიდან ოფიციალურად 5 მარტს გადააყენა. გენერალური დირექტორის ვაკანტურ თანამდებობაზე ღია კონკურსი იმავე დღესვე გამოცხადდა.
