არასამთვრობო ორგანიზაცია "საერთაშორისო გამჭვირვალობა-საქართველო" განათლების სამინისტროს აგრარულ უნივერსიტეტთან დაკავშირებუილი პროცესის გამჭვირვალობისკენ მოუწოდებს.
როგორც ორგანიზაციის ვებ-გვერდზეა აღნიშნული, აგრარულ უნივერსიტეტში ბოლო რამდენიმე წლის განმავლობაში მნიშვნელოვანი რეფორმები განხორციელდა, რის შედეგადაც უნივერსიტეტი ქვეყნის წამყვანი სასწავლო დაწესებულებების პირველ ათეულში მოხვდა.
ორგანიზაციის წარმომადგენლების ინფორმაციით, განათლების ხარისხის განვითარების ეროვნული ცენტრის მიერ აგრარული უნივერსიტეტის შემოწმება 3 იანვარს დაიწყო.
მათივე თქმით, ავტორიზაციის შეწყვეტა მიმდინარე სემესტრის დასრულების შემდეგ სტუდენტების სხვა უნივერსიტეტებში გადანაწილებას გულისხმობს.
"ამ ეტაპზე შეუძლებელია ზუსტად დადგენა, თუ კონკრეტულად რა დარღვევების საფუძველზე მოხდა ავტორიზაციის შეჩერება, თუმცა მედიაში გავრცელებული ინფორმაციის მიხედვით შეიძლება ითქვას, რომ დარღვევების რელევანტურობა და მათ საფუძველზე ავტორიზაციის გაუქმება ბევრ კითხვის ნიშანს აჩენს", - აცხადებენ "საერთაშორისო გამჭვირვალობაში".
მათივე თქმით, სხვადასხვა ინფორმაცია ვრცელდება იმასთან დაკავშირებით, მიეცა თუ არა უნივერსიტეტს კანონმდებლობით დადგენილი 15-დღიანი ვადა ხარვეზების გამოსასწორებლად.
როგორც ორგანიზაციაში აცხადებენ, არსებობს ეჭვი, რომ გადაწყვეტილება შეიძლება უნივერსიტეტის მართვაში ყოფილი ხელისუფლების წარმომადგენლების მონაწილეობას უკავშირდებოდეს, რაც მეტად შემაშფოთებელია.
"განათლების სამინისტროს და განათლების ხარისხის განვითარების ეროვნულ ცენტრს მოვუწოდებთ. პროცესის გამჭვირვალობა მაქსიმალურად უზრუნველყონ, რათა მათი გადაწყვეტილებები პოლიტიკურად მოტივირებულ ქმედებად უნივერსიტეტის თანამშრომლების, სტუდენტებისა და საზოგადოების მიერ არ იქნეს აღქმული", - აცხადებენ ორგანიზაციის წარმომადგენლები.
ამასთან, ისინი პოლიტიკური თანამდებობის პირებს პოლიტიკური განცხადებებისგან თავშეკავებას ურჩევენ.
აგრარულ უნივერსიტეტს ავტორიზაცია გუშინ შეუჩერდა. გადაწყვეტილება განათლების ხარისხის განვითარების ეროვნული ცენტრის ავტორიზაციის საბჭომ 9-საათიანი განხილვის შემდეგ მიიღო.
