13 მარტს დაბა ყაზბეგში, სტეფანწმინდის ცენტრში, ადგილობრივმა მოსახლეობამ ყაზბეგის რეგიონში მშენებარე ჰესების მხარდამჭერი აქცია გამართა.
ბოლო პერიოდში მუსირებს აზრი, თითქოს ყაზბეგის მოსახლეობა რეგიონში ჰესების მშენებლობას ეწინააღმდეგება. აქციის მონაწილეთა მიზანია დაარწმუნოს საზოგადოება რომ ისინი არათუ არ ეწინააღმდეგებიან ჰესების მშენებლობას, არამედ ეს საქმე ამ ეტაპზე მათი რეგიონის განვითარების ერთადერთ რეალურ შესაძლებლობად მიაჩნიათ.
ადგილობრივი მოსახლეებისგან დაკომპლექტებულმა საინიციატივო ჯგუფმა უკვე სცადა ყაზბეგელების პოზიციის სხვა ფორმით დაფიქსირება. მათ გარემოსა და ბუნებრივი რესურსების სამინისტროს 2013 წლის 4 მარტს გაუგზავნეს 1700 ყაზბეგელის ხელმოწერა, რითიც ისინი ადასტურებდნენ, რომ არაფერი აქვთ საწინააღმდეგო ჰესების მშენებლობასთან დაკავშირებით და პირიქით მიაჩნიათ, რომ მსგავსი მშენებლობები ხელს შეუწყობს რეგიონის განვითარებას და რაც ყველაზე მნიშვნელოვანია დამატებით სამუშოა ადგილებს გააჩენს ხევში.
გიორგი ფიცხელაური, ყაზბეგელი: „ მხარს ვუჭერთ ჰესების მშენებლობას. ვაპროტესტებთ იმას, რომ ჩვენს პოზიციას არ ითვალისწინებს გარემოს დაცვის სამინისტრო. 27 თებერვალს გარემოს დაცვის მინისტრი ქალბატონი ხათუნა გოგალაძე იყო ჩამოსული. ჩვენ შევიკრიბეთ რათა დაგვეფიქსირებინა ჩვენი პოზიცია, თუმცა მინისტრი არ შეგვხვდა. ველოდეთ და შემდეგ დავიშალეთ. გვითხრეს, რომ ჩვენი პოზიციის მოსასმენად იყო ჩამოსული სინამდვილეში კი ასე არ მოხდა".
აქციის შემდეგ მონაწილეები აპირებდნენ თბილისში გარემოს დაცვის სამინისტროში მისვლას. თუმცა ჯვარის უღელტეხილზე ჩამოწოლილი ზვავის გამო ჯერჯერობით ვერ ახერხებენ ჩამოსვლას.
ყაზბეგის რეგიონში ორი ჰესის (დარიალი 108 მგვტ და ლარსი 19,5 მგვტ) მშენებლობა მიმდინარეობს, მესამე - ყაზბეგი ჰესზე ინვესტორები გარემოს დაცვის სამინისტროსგან ნებართვას ელოდებიან. უკვე მიმდინარე მშენებლობებზე 150 ადამიანზე მეტია დასაქმებული.
