ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ 100-მდე დევნილ ოჯახს საცხოვრებელი ბინა გადასცა. დევნილებმა თეთრიწყაროს რაიონში რეაბილიტირებული ბინის გასაღები მიიღეს.
აფხაზეთიდან, ცხინვალის რეგიონიდან და კოდორის ხეობიდან დევნილი მოსახლეობა თეთრიწყაროში დევნილთა სამინისტრომ დღეს ჩაიყვანა. აღნიშნული ოჯახები დღემდე თბილისსა და რეგიონებში კერძო სექტორში (ქირით ან ნათესავთან) ცხოვრობდნენ და 19 წლის განმავლობაში მოლოდინის რეჟიმში იმყოფებოდნენ. როგორც დევნილებმა აღნიშნეს, გახარებულები არიან, რომ 19 წლიანი მოლოდინის შემდეგ საკუთარი ჭერი გაუჩნდათ. მათივე თქმით, ვერ წარმოედგინათ, რომ ხელისუფლების ცვლილებიდან ასეთ მოკლე ვადაში საცხოვრებელი ბინით დაკმაყოფილდებოდნენ.
„19 წელი გაჭირვებაში გადავიტანეთ. ბინიდან ბინაში გადავდიოდით. ხან ვინ შეგვიკედლებდა და ხან - ვინ. გახარებული ვარ, 5 სულიანი ოჯახს 3 ოთახიანი გარემონტებული ბინა გადმოგვცეს. სამინისტრომ და ჩვენმა სახელმწიფომ ძალიან გამახარა. საკუთარი ჭერი როგორც იქნა, გვეღირსა. გაიხარეთ ყველამ, ამ კარგი და კეთილი საქმისთვის"- აღნიშნა კოდორის ხეობიდან დევნილმა ვალერ ფანგანმა.
როგორც ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის მოადგილე მამუკა ცოტნიშვილმა დევნილებთან საუბრისას აღნიშნა, დევნილების საცხოვრებელი ფართით დაკმაყოფილების პროცესი გაგრძელდება: „დღეს საცხოვრებელი ბინა გადავეცით იმ დევნილ ოჯახებს, რომლებიც წლების განმავლობაში მოლოდინის რეჟიმში იმყოფებოდნენ და სახელმწიფოსგან არასდროს არაფერი მიუღიათ. ბინიდან ბინაში გადადიოდნენ და ძალიან წვალობდნენ. დევნილთა საცხოვრებელი ფართით დაკმაყოფილება გაგრძელდება. აპრილის დასაწყისისთვის საცხოვრებელი ბინები იმერეთის რეგიონშიც განაწილდება."