აჭარის მთავრობა, წინა მთავრობის დაანონსებულ პროექტზე უარს არ ამბობს და ხელვაჩაურში სამრეწველო ზონის განვითარების პროექტზე მუშაობს.
როგორც სააგენტო „ჯი-ეიჩ-ენს" აჭარის მთავრობის ხელმძღვანელმა არჩილ ხაბაძემ განუცხადა, ზონის მოწყობის პროექტი წინა ხელისუფლების პირობებშიც არსებობდა, თუმცა მიმდებარედ სათანადო ინფრასტრუქტურა მოწყობილი არ ყოფილა.
„ხელვაჩაურში სამრეწველო ზონის განვითარების პროექტი არსებობდა, რომლის მიხედვითაც იმ მიწების ათვისება უნდა მომხდარიყო, სადაც არანაირი კომუნიკაცია არ არსებობს, ანუ უნდა გაეყვანათ გზა, წყალი, ელექტრო ენერგია და სხვა კომუნიკაციები და შემდეგ გაეცათ იჯარით შემდგომი განვითარების მიზნით. აღნიშნულ პროექტზეც ვაგრძელებთ მუშაობას. კიდევ ერთხელ კარგად შევისწავლით, რამდენად მომგებიანი იქნება ეს რეგიონისთვის და ამის შემდეგ მივიღებთ გადაწყვეტილებას"- განაცხადა „ჯი-ეიჩ-ენთან" საუბრისას არჩილ ხაბაძემ.
