დღეს, 18 თებერვალს, 14:00 საათზე, სასტუმრო „რედისონ ბლუ ივერიაში" (თბილისი, ვარდების რევოლუციის მოედანი) გაიმართება სპეციალური პრესკონფერენცია, რომლის დროსაც მოხდება „არაალკოჰოლური სასმელების მწარმოებელთა ასოციაციის" პრეზენტაცია. ღონისძიების დროს, სიტყვით გამოვლენ და ჟურნალისტების კითხვებს უპასუხებენ ასოციაციის დამფუძნებელი მსხვილი ქართული კომპანიების წარმომადგენლები. ქართველი მწარმოებლების გაერთიანება მომავალში გეგმავს დარგში არსებული პრობლემების გადაჭრისთვის, სფეროს მომავალი განვითარებისა და ექსპორტის გაძლიერებისთვის სხვადასხვა სახის ერთობლივი პროექტების განხორციელებას.
ასოციაციის პირველი მნიშვნელოვანი წამოწყება კი არააქციზური საქონლის სავალდებულო მარკირების რეგულაციის გაუქმებისკენ ან შეცვლისკენ იქნება მიმართული, რაც კომპანიების წარმომადგენელთა განცხადებით, მნიშვნელოვანი ტესტი იქნება, როგორც გაერთიანების, ასევე სახელმწიფოსა და ბიზნესს შორის თანამშრომლობის ჩამოყალიბების გზაზე.
