დღეს საქართველოს რეგიონული განვითარებისა და ინფრასტრუქტურის მინისტრი დავით ნარმანია, გარემოს დაცვის მინისტრი ხათუნა გოგალაძე და ენერგეტიკის და ბუნებრივი რესურსების დაცვის მინისტრი კახი კალაძე შვედური ორგანიზაციების MFA და SIDA -ს წარმომადგენლებს შეხვდნენ. აღნიშნული ორგანიზაციები საქართველოსთან უკვე არაერთი წელია თანამშრომლობენ და მრავალი მიმართულებით უწევენ დახმარებას.
ამჯერად გამართულ შეხვედრაზე სწორედ საქართველოს მთავრობასა და შვედეთის სამეფოს შორის სამომავლო თანამშრომლობის სფეროებსა და პერსპექტივებზე შეჩერდა ყურადღება.
შეხევდრაზე რეგიონული განვითარებისა და ინფრასტრუქტურის მინისტრმა ყურადღება დეცენტრალიზაციის საკითხებზე, დეცენტრალიზაციის პროცესში შვედური ორგანიზაციების მხარდაჭერაზე, მყარი ნარჩენების მართვის პოლიტიკასა და აღნიშნულ სფეროში შვედეთთან თანამშრომლობის სამომავლო პერსპექტივებზე გაამახვილა.
აღსანიშნავია, რომ შვედეთის სამეფოს მთავრობა, შვედეთის საერთაშორისო განვითარების სააგენტოს მეშვეობით (SIDA), 2006 წლიდან მნიშვნელოვან მხარდაჭერას უწევს საქართველოს საერთაშორისო სტანდარტების სანიტარული ნაგავსაყრელების მოწყობისა და ნარჩენების ტრანსპორტირების სისტემის სრულყოფის, ასევე წყალმომარაგებისა და წყალარინების სისტემების მოწესრიგების მიზნით.
შეხვედრაზე მხარეებმა გამოთქვეს მზადყოფნა და იმედი, რომ შვედეთისა და საქართველოს შესაბამის უწყებებს შორის თანამშრომლობა მომავალშიც წარმატებით გაგრძელდება.