საქართველოს ფინანსთა სამინისტროს ახალი გუნდი განაგრძობს ინტენსიურ თანამშრომლობას ბიზნესსექტორთან, რითაც სამინისტრო კიდევ ერთხელ ადასტურებს, რომ ბიზნესთან პარტნიორობა მისი პოლიტიკის ერთ-ერთი ძირითადი პრიორიტეტია.
11 თებერვალს სასტუმრო „შერატონ მეტეხი პალასში" საქართველოს ბიზნეს ასოციაციის ინიციატივით, ფინანსთა მინისტრი ნოდარ ხადური ქვეყანაში მოქმედი მცირე, საშუალო და მსხვილი ბიზნეს ორგანიზაციების 100-მდე წარმომადგენელს შეხვდა.
შეხვედრაზე ფინანსთა მინისტრმა ბიზნეს ასოციაციის წევრებს გააცნო მთავრობის ეკონომიკური პოლიტიკა, რომელის ერთ-ერთი მთავარი პრიორიტეტია - ბიზნესის წარმოება საქართველოში იყოს თავისუფალი ხელისუფლების წარმომადგენელთა ჩარევისგან, ქვეყანაში აღარ არსებობდნენ პრივილეგირებული ბიზნესმენები, კანონი ყველასთვის იყოს თანაბარი და ბაზარზე მოქმედებდეს ჯანსაღი კონკურენციის პირობები.
ბიზნესმენებთან შეხვედრაზე განიხილეს ყველა ის საკითხი, რომელიც ბიზნესისთვის აქტუალურია, მათ შორისაა, ბიზნესის ხელშეწყობისთვის საგადასახადო და საბაჟო სფეროში ფინანსთა სამინისტროს მიერ დაგეგმილი რეფორმები, კანონმდებლობის დახვეწის კუთხით გათვალისწინებული სიახლეები, დავების განხილვის საბჭოს მუშაობა, სალიზინგო საქმიანობის ხელშეწყობა, განიხილეს ლიბერალიზაციის მიმართულებით საგადასახადო კოდექსში ცვლილელების ამოქმედების შემდეგ არსებული ვითარება და ამ კუთხით ბიზნესის მხრიდან გამოთქმული შენიშვნები და მოსაზრებები. იმსჯელეს 2013 წელს ეკონომიკური ზრდისა და მაკროეკონომიკური სტაბილურობისთვის სამინისტროს მიერ დაგეგმილ ღონისძიებებზე.
„ჩვენი ამოცანაა ბიზნესთან თანამშრომლობით ავაშენოთ ეკონომიკურად ძლიერი ქვეყანა, რაც წარმოუდგენელია სახელმწიფოსა და ბიზნესს შორის პარტნიორობის გარეშე. ბიზნესისგან არის სრული მზადყოფნა, რომ გაზარდონ ინვესტიციები, დასაქმებულ ადამიანთა რაოდენობა. საუბარი შეეხო იმ რეალობას, რომელშიც დღეს საქართველოა და იმ გზებს და ხედვებს, რომლებიც ახალ მთავრობას აქვს, მათ შორის, საგადასახადო კანონმდებლობის მიმართულებით,"- განაცხადა ფინანსთა მინისტრმა, ნოდარ ხადურმა.
„მნიშვნელოვანი და დადებითია ის, რომ ფინანსთა მინისტრმა მოისმინა ყველა ის პრობლემა, რომელიც დღეს ბიზნესს აწუხებს. ბევრ საკითხზე საერთო პოზიციები დავაფიქსირეთ. ჩვენთვის ყველაზე პრინციპულია, არსებობდეს კომუნიკაცია, რაც ბიზნესს და ხელისუფლებას საშუალებას მისცემს იყოს მუდმივი დიალოგი, რომლის დროსაც მთავრობას მივაწვდით ჩვენს რეკომენდაციებს და წინადადებებს, - განაცხადა ბიზნეს ასოციაციის პრეზიდენტმა გიორგი ჭირაქაძემ.
ფინანსთა მინისტრმა ანალოგიური ფართომასშტაბიანი შეხვედრა აჭარაში მოღვაწე ბიზნესის სფეროსა და ბიზნესგაერთიანების 200-მდე წარმომადგენელთან გამართა. ბიზნესსექტორი ასევე დეტალურად გაეცნო საგადასახადო კოდექსში შესულ ცვლილებებს.
ფინანსთა სამინისტროს მხრიდან დიალოგი მომავალშიც აქტიურად გაგრძელდება, რათა ბიზნესსაზოგადოებას ჰქონდეს დეტალური ინფორმაცია სამინისტროს მიერ დაგეგმილი რეფორმების შესახებ. სამინისტრო მზადაა ყველა გადაწყვეტილება მიიღოს ბიზნესსექტორის წარმომადგენლებთან კონსულტაციების შედეგად.
