რეგიონული განვითარებისა და ინფრასტრუქტურის სამინისტროს ინფორმაციით, 2013 წელს, პროექტების გახორციელების კუთხით, 180 მილიონი ლარით მეტი დაიხარჯება, ვიდრე 2012 წელს დაიხარჯა. ახალი პროექტების დაწყებასთან ერთად, გაგრძელდება ყველა ის გარდამავალი პროექტი, რომელიც გასულ წელს დაიწყო.
სამინისტროში განმარტავენ, რომ ინფრასტრუქტურის მოწესრიგება რეგიონული განვითარების ერთ-ერთი უმთავრესი წინაპირობაა. ამდენად, რეგიონული განვითარებისა და ინფრასტრუქტურის სფერო ერთმანეთთან მჭიდრო კავშირშია. ინფრასტრუქტურის მიმართულება მოიცავს: საერთაშორისო და შიდასახელმწიფოებრივი გზების (240 კმ), ხიდების (30 ხიდი), გვირაბების (3 გვირაბი) მშენებლობა-რეაბილიტაციას, საქართველოს რეგიონებში (42 მუნიციპალიტეტში) წყალმომარაგების სისტემის სარეაბილიტაციო სამუშაოების და ნაპირსამაგრი სამუშაოების განხორციელებას. ასევე, ნაგავსაყრელების მართვასა და ინ¬ფრა¬სტრუქ¬ტურული ობიექტების სამშენებლო, სარეაბილიტაციო და სხვა სახის სამუშაოების განხორციელების კოორდინაციას.
2013 წლის სამოქმედო გეგმა, ასევე, მოიცავს:
სამინისტროს სისტემის სტრუქტურულ ოპტიმიზაციასა და კადრების ატესტაციას;
სერვისის ხარისხის გაუმჯობესებას, რაც გულისხმობს სატენდერო პირობებში მკაცრი და მკაფიო ხარისხის მოთხოვნების ჩადებასა და ხარისხის კონტროლის გაძლიერებას;
პროექტების კოორდინაციის მოწესრიგებული სისტემის შექმნასა და და მმართველობითი წესრიგის დამყარებას;
საზოგადოების ინფორმირებულობასა და სამინისტროს საქმიანობის გამჭვირვალეობის უზრუნველყოფას.
წყალმომარაგებისა და საგზაო ინფრასტრუქტურის მშენებლობა-რეაბილიტაციის თვალსაზრისით დაგეგმილია როგორც ახალი მსხვილი ინფრასტრუქტურული პროექტების, ისე მიმდინარე პროექტების გახორციელება. მათ შორის, განსაკუთრებით აღსანიშნავია:
აზიის განვითარების ბანკის დაფინანსებით მიმდინარე წყალმომარაგების სარეაბილიტაციო სამუშაოები ქუთაისში, ფოთში, ურეკში, ანაკლიასა და მესტიაში.
ევროპის საინვესტიციო ბანკის დაფინანსებით მიმდინარე წყალმომარაგების მშენებლობა-რეაბილიტაციის პროექტები საქართველოს 28 ქალაქში.
ჩქაროსნული ავტომაგისტრალის რუისი-აგარას 19 კმ-იანი მონაკვეთის მშენებლობა. აღნიშნულ მონაკვეთზე აშენდება 2 ესტაკადა, 5 გზაგამტარი; დაიწყება აგარა-გომის 12 კმ-იანი მონაკვეთის მშენებლობა. იგოეთი-რუისის მონაკვეთზე დასრულდება დარჩენილი სამუშაოები. გაგრძელდება ზესტაფონი-ქუთაისი-სამტრედიის 58 კმ მონაკვეთის მშენებლობა, დაიწყება სამტრედია-ლანჩხუთის 30 კმ-იანი მონაკვეთის მშენებლობა, დასრულდება ქობულეთის შემოვლითი გზის პირველი ლოტის (15 კმ) მშენებლობა, დაიწყება ამავე გზის მეორე ლოტის მშენებლობა (18 კმ);
ქ. თბილისში მეტროსადგურ ვაჟა-ფშაველასა და უნივერსიტეტის დამაკავშირებელი გვირაბისა და უნივერსიტეტის სადგურის მშენებლობა (2,2 კმ სიგრძის გვირაბი);
თბილისი-რუსთავის ჩქაროსნული საავტომობილო გზის II მონაკვეთის პროექტირების დასრულება და სამშენებლო სამუშაოების დაწყება პირველ და მესამე მონაკვეთებზე (17 კმ. ჩქაროსნული 4-ზოლიანი გზა);
დევნილთა სახლების მშენებლობა-რეაბილიტაცია და ა.შ.
სამინისტროს მიზანს წარმოადგენს ზემოთ ჩამოთვლილ პროექტებთან დაკავშირებით დაგეგმილ ტენდერებში მაქსიმალურად მაღალი კონკურენციის უზრუნველყოფა. ამ მიზნის მისაღწევად სამინისტროს მიერ მიღებული იქნა გადაწყვეტილება კომპანიებისთვის საკვალიფიკაციო მოთხოვნების შემცირების თაობაზე. აღსანიშნავია, რომ პირველივე გახსნილ ტენდერზე მაღალი კონკურენცია დაფიქსირდა, სადაც 22-მა პრეტენდენტმა მიიღო მონაწილეობა.
2013 წლის იანვარში - მხოლოდ ერთ თვეში სამინისტროს დაქვემდებარებაში არსებული დაწესებულებების მიერ გამოცხადებულ იქნა 30-ზე მეტი ტენდერი, საერთო ღირებულებით 35 მილიონ ლარამდე.
