დღეს ფინანსთა მინისტრი ნოდარ ხადური საქართველოში მოქმედი ოცი კომერციული ბანკის პირველ პირს შეხვდა. შეხვედრას ასევე დაესწრნენ ეროვნული ბანკის ვიცე-პრეზიდენტი არჩილ მესტვირიშვილი და ბანკების ასოციაციის პრეზიდენტი ზურაბ გვასალია. შეხვედრაზე იმსჯელეს საბანკო სექტორში არსებულ მდგომარეობასა და სამომავლო პერსპექტივაზე, ბანკების მხრიდან რეალური სექტორის დაფინანსების, ბაზარზე საკრედიტო აქტივობის საკითხებზე. ასევე, განხილვის ერთ-ერთი თემა ქვეყანაში ფასიანი ქაღალდების ბაზრის განვითარება იყო. "ძალიან კმაყოფილი ვარ, მიუხედავად იმისა, რომ ბევრ მათგანთან პირველად გვქონდა შეხვედრა. ბანკების ხელმძღვანელებს გავაცანით ჩვენი ხედვები, მათ შორის, მაკროეკონომიკური პროგნოზები და შევეცადეთ გაგვეგო ის პრობლემები, რომლებიც კომერციულ ბანკებს აქვთ. მნიშვნელოვანია, ჩვენი შეთანხმება, რომ ისინი ფინანსთა სამინისტროსგან ყოველდღიურ რეჟიმში მიიღებენ ინფორმაციებს ბიუჯეტის შესახებ, ზოგადად, ეკონომიკაში მიმდინარე პროცესებზე. ფინანსთა სამინისტრო მზადაა ინტენსიურად, თოთოეული ბანკის ხელმძღვანელთან, ბიზნესმენთან ერთად გაიაროს ის პრობლემები, რომელიც აწუხებს ბიზნესსექტორს, იმისთვის, რათა უკეთესი ბიზნესგარემო შევქმნათ ქვეყანაში ", - განაცხადა ფინანსთა მინისტრმა.