ის პრობლემები, თუ არეულობა რაც დღეს ხდება კოალიცია "ქართული ოცნების" შიგნით, პოლიტიკაში ჩახედული არც ერთი ადამიანისათვის მოულოდნელი არ უნდა ყოფილიყო. მით უფრო, რომ ეს არეულობა თავად კოალიციის ლიდერისგან მოდის, - ამის შესახებ "ჯი-ეიჩ-ენთან" საუბარში პარტია "იმედი"-ს თავმჯდომარემ ირინა სარიშვილმა განაცხადა.
"ვგულისხმობ ირაკლი ალასანიას მიმართ გაკეთებულ განცხადებებს და გადადგმულ ნაბიჯებს. ასევე, ეს ეხება გუბაზ სანიკიძეს და სხვას და სხვას. ამას ხაზს ვუსვამ იმიტომ, რომ არანაირი სიახლე ირაკლი ალასანიას სურვილში გამხდარიყო პრეზიდენტი და არც გუბაზ სანიკიძის პრიორიტეტებში ბიძინა ივაშვილისათვის არ უნდა ყოფილიყო. თუ გავიხსენებთ სატელეფონო ჩანაწერებს და თუ გავიხსენებთ არჩევნების წინ იმ სიტუაციას, რა სიტუაციშიც ივანიშვილი და ალასანია, როგორც პარტნიორები, ისე წარსდგებოდნენ საზოგადოების წინაშე. არ მგონია, რომ ეს მისთვის უცნობი ყოფილიყო", - აცხადებს სარიშვილი.
მისივე აზრით, ბიძინა ივანიშვილისათვის არც ის უნდა ყოფილიყო უცხო და მოულოდნელი, რომ ამ სახის ნაბიჯების გადადგმა არეულობას გამოიწვევდა და საფრთხის ქვეშ დააყენებდა გამარჯვებული პარტიის უმრავლესობაში დარჩენას პარლამენტში.
"მე მაღალი აზრის არ ვარ მის პოლიტიკურ თვისებებსა და მასზე, როგორც პოლიტიკოსზე, მაგრამ გამომდინარე ბიზნესმენობიდან, თვლა ნამდვილად იცის. იმას თუ გავითვალისწინებთ, რომ 25 % დათმობილი აქვთ, იმასაც თუ გავითვალისწინებთ, რომ აი, ამ დათმობების შემდგომ კიდევ რაღაც-რაღაც გადარბენა-გადმორბენებს ჰქონდა ადგილი, ძალიან ადვილი წარმოსადგენია, რომ კოალიციამ დაკარგოს უმრავლესობა", - აცხადებს "ჯი-ეიჩ-ენთან საუბარში ირინა სარიშვილი.
