ჩემი მთავარი რჩევა ხელისუფლების მიმართ იქნება საქმე ლაპარაკის ნაცვლად, რაც ჩვენი ხელისუფლების ლოზუნგი იყო- განაცხადა საქართველოს პრეზიდენტმა მიხეილ სააკაშვილმა ქუთაისში, აკაკი წერეთლის სახელმწიფო უნივერსიტეტში სტუდენტებთან შეხვედრაზე. მისი თქმით, ხალხი საქმეს ელოდება. "მთავრობის ჩაფლავება საქართველოს ჩაფლავებას ნიშნავს, ეს კი როგორ შეიძლება მე მიხაროდეს".
მიხეილ სააკაშვილმა იმ პროექტებზე ისაუბრა, რომელთა განხორციელბაც ქუთაისში იგეგმებოდა და ამ ეტაპზე შეჩერებულია. ქვეყნის პირველმა პირმა საქართველოს პარლამენტის ქუთაისში ფუნქციონირების მნიშვნელობაზე გაამახვილა ყურადღება და აღნიშნა, რომ ქუთაისის საპარლამენტო ქალაქად ქცევა მიზნად ისახავდა მთლიანად დასავლეთ საქართველოს განვითარებას. სააკაშვილის თქმით, პარლამენტის ქუთაისში ფუნქციონირება რეგიონს განსაკუთრებულ მნიშვნელობას შესძენდა, მათ შორის, დასაქმების, ახალი ინვესტიციების მოზიდვისა და ტურისტული პოტენციალის განვითარების თვალსაზრისით. პრეზიდენტმა იმ საშიშროებებზე გაამახვილა ყურადღება, რაც პარლამენტის ქუთაისიდან გადატანას მოყვება. პრეზიდენტმა იმ მიღწევების შესახებაც ისაუბრა, რომელიც ნაციონალურ მოძრაობას ცხრა წლის განმავლობაში ჰქონდა, კრიმინალის შემცირების თუ ინფრასტრუქტურის განვითარების კუთხით და აღნიშნა, რომ ახალი მთავრობა სწორედ იმ სახეებს აბრუნებს თანამდებობებზე, რომელთა ხელისუფლებაში ყოფნის დროს ქვეყანას არავითარი პერსპექტივა არ გააჩნდა.