სახალხო კრების ერთ-ერთი ლიდერის ირაკლი ბათიაშვილის განცხადებით, კოდორის ხეობის დაკარგვა დანაშაულად მიხეილ სააკაშვილს, ვანო მერაბიშვილს და ირაკლი ოქრუაშვილს აწევს. ამის შესახებ ბათიაშვილმა დღეს "პრაიმ ტაიმის" პრესკლუბში გამართულ პრესკონფერენციაზე განაცხადა.
"მინდა, გითხრათ, რომ უამრავი საქმეა გამოსაძიებელი. საზოგადოებაში ბევრი პასუხგაუცემელი კითხვაა. არის ისეთი საქმეებიც, რომლებზეც მაღალჩინოსნები არიან პასუხისმგებლი. სისხლის სამართლებრივი პასუხისმგებლობის საქმე უნდა დადგეს ისეთ დანაშაულებზე როგორიცაა, სანაპიროზე ბიჭების ჩაცხრილვა, გირგვლიანის მკვლელობა, პრემიერ ზურაბ ჟვანიას მკვლელობა, ციხის ბუნტი და მრავალი სხვა. ამ საქმეებში არის ასევე კოდორის ხეობის დაკარგვა. ოთხი თვე გავიდა არჩევნებიდან და ახალი არაფერია ამ საქმეებთან დაკავშირებით. კოდორის ხეობის დაკარგვა აუცილებლად გამოსაძიებელია. ემზარ კვიციანს სააკაშვილის რეჟიმი ბრალს კოდორის დაკარგვაში სდებდა, სააკაშვილმა წარმოუდგენელი რამ გააკეთა, ჯარი შეიყვანა კოდორში და განაიარაღა. ეს იგივეა, რომ კახეთში შეიყვანო ჯარი. ეს იყო ადგილი, რომელსაც წლების განმავლობაში კოდორელები მტრებისგან იცავდნენ. ვერასოდეს ვერავინ წარმოიდგენდა, რომ რომელიმე ხელისუფლება გააკეთებდა იმას, რომ კოდორი განეიარაღებინათ და ამით რუსებისთვის გზა გაეხსნათ. ამ სპეცოპერაციაზე გაერო-მ მიიღო სპეციალური რეზოლუცია, რომელშიც კოდორის სპეცოპერაცია პირდაპირ იყო დაგმობილი. ამით საქართველომ დაარღვია 1994 წლის შეთანხმება აფხაზეთთან ცეცხლის შეწყვეტის თაობაზე და ფაქტიურად რუსებს თავიანთი ხელით გადასცა კოდორი. ხოლო ემზარ კვიციანი იყო პიროვნება, რომელიც წლების განმავლობაში იცავდა ამ ხეობას. კოდორის ხეობის დაკარგვის დანაშაული აწევს წინა ხელისუფლებას, კერძოდ, მიხეილ სააკაშვილს, ვანო მერაბიშვილს და ირაკლი ოქრუაშვილს და ამ საქმეს სერიოზული გამოძიება სჭირდება",- განაცხადა ბათიაშვილმა.