გათავისუფლებული ყოფილი პოლიტპატიმრები საქართველოს მთავარ პროკურატურაში სარჩელს შეიტანენ. პროკურატურას სარჩელით ყოფილი პოლიტპატიმარი ვახტანგ მაისაია დღეს მიმართავს. მაისაია თავის საქმეზე გრიფით საიდუმლოს მოხსნასა და საქმის დეტალების გასაჯაროებას მოითხოვს. როგორც მაისაიას ადვოკატი ნათია კორკოტაძე განმარტავს ისინი ფულად კომპენსაციას აუცილებლად მოითხოვენ.
პროკურატურას სარჩელით ასევე მიმართავს გიორგი ზერეკიძეც. ის დამნაშავეების დასჯას და საქმის გასაჯაროებას მოითხოვს. გიორგი ზერეკიძის განცხადებით, ის მატერიალურ კომპენსაციას არ ითხოვს.
ამასთან დღესვე გათავისუფლებული პოლიტპატიმრები და ადამიანის უფლებათა დაცვის კომისია ოკუპაციის მუზეუმში პრესკონფერენციას გამართავენ. გათავისუფლებული პოლიტპატიმრები მათ საქმეებზე გრიფით საიდუმლოს მოხსნასა და საქმის მასალების გასაჯაროებას მოითხოვენ.
პოლიტპატიმრები ასევე პრეზიდენტის იმპიჩმენტის საკითხის დაყენებასაც ითხოვენ. ისინი ამ მოთხოვნებით პარლამენტსაც მიმართავენ. ყოფილი პოლიტპატიმრები 13 იანვრის პოლიტპატიმართა თავისუფლების დღედ გამოცხადებას მოითხოვენ და მათ ამ მოთხოვნებს არასამთავრობო ორგანიზაციებიც უერთდებიან.
