საქართველოს პრეზიდენტი მიხეილ სააკაშვილი პატრულის მხრიდან ქრთამის აღების ფაქტებზე საუბრობს. ამის შესახებ მიხეილ სააკაშვილმა ზუგდიდში, საკრებულოს წევრებთან შეხვედრისას განაცხადა.
"სამწუხაროდ, დაფიქსირდა პატრულის მიერ ქრთამის აღების პირველი შემთხვევები", - განაცხადა პრეზიდენტმა და აღნიშნა, რომ წარსულში კორუფციასა და კონტრაბანდაში გასვრილი კადრები დღეს თანამდებობებზე დაბრუნდნენ.
"მაგალითად, სამეგრელოს ერთ-ერთ რაიონში პოლიციის უფროსად დანიშნეს შევარდნაძის დროინდელი კადრი, მეტსახელად "ყულაბა". დაბრუნდა ხალხი, რომელსაც შევარდნაძის დროს გადახდილი ჰქონდა ფული თანამდებობებზე დანიშვნაზე, შემდეგ გაიყარნენ, ახლა კი მასობრივად დაბრუნდნენ უკან. სამწუხაროდ, დაფიქსირდა პატრულის მიერ ქრთამის აღების პირველი შემთხვევები", - განაცხადა პრეზიდენტმა.
მისივე თქმით, ეს ყველაფერი ხდება იმის ფონზე, როდესაც ბევრი მშენებლობა და სამეგრელოსთან მიმართებაში არსებული მრავალი პროექტი შეჩერებულია.
"შეჩერებულია დიდი პორტის მშენებლობა, რომელიც იყო გადამწყვეტი სამეგრელოს შემდგომი განვითარებისთვის. ამ პირობებში ხდება წარსულის რესტავრაციის მცდელობა. ამიტომ პრეზიდენტის რწმუნებულები არის ის ხალხი, ვისზეც გადის ბრძოლის ხაზი, რომ არ მოხდეს საქართველოში კორუმპირებული, კრიმინალური წარსულის რესტავრაცია და გავაგრძელოთ განვითარება", - აღნიშნა მიხეილ სააკაშვილმა.