საქართველოს საგარეო საქმეთა მინისტრი მაია ფანჯიკიძე 10-15 იანვარს ლიტვას, ლატვიას და ჩეხეთს ეწვევა. როგორც "ჯი-ეიჩ-ენს საგარეო უწყებიდან აცნობეს, მინისტრი თავის კოლეგებთან ერთად აღმასრულებელი და საკანონმდებლო ხელისუფლების სხვა მაღალ წარმომადგენლებს შეხვდება.
დაგეგმილია ფანჯიკიძის გამოსვლა ვილნიუსში, აღმოსავლეთ ევროპის სწავლების ცენტრში, თემაზე: "საქართველოს საგარეო და უსაფრთხოების პოლიტიკა - განგრძობადობა თუ ცვლილება".
ასევე, გაიმართება ლიტვა-საქართველოს შორის ევროპული და ევრო-ატლანტიკური ინტეგრაციის საკითხებში არსებული კომისიის 2013 წლის სამოქმედო გეგმის ხელმოწერის ცერემონია. ლიტვის რესპუბლიკაში ვიზიტის ფარგლებში, საქართველოს საგარეო საქმეთა მინისტრი მონაწილეობას მიიღებს ქალაქ თრაკაიში დაგეგმილ " Snow Meeting "-ში. როგორც საგარეო უწყებაში აცხადებენ, ეს იქნება პირველი შემთხვევა, როდესაც სხვადასხვა ქვეყნის მაღალი რანგის ოფიციალური პირების, ასევე საერთაშორისო და უსაფრთხოების საკითხებში ექსპერტთა ყოველწლიურ არაფორმალურ განხილვებს საქართველოს საგარეო საქმეთა მინისტრი დაესწრება.
14 იანვარს იგეგმება საქართველოს საგარეო საქმეთა მინისტრის გამოსვლა არასამთავრობო ორგანიზაციაში - LATO (Latvian Transatlantic Organisation, ლატვიის ტრანსატლანტიკური ორგანიზაცია).
საქართველოს საგარეო საქმეთა მინისტრი, ვიზიტის ფარგლებში ლიტველ, ლატვიელ და ჩეხ კოლეგებთან ერთად გამართავს ერთობლივ პრესკონფერენციას. აგრეთვე იგეგმება ინტერვიუები წამყვან მედია საშუალებებთან.
