საკონსტიტუციო ცვლილებების განხილვის საორგანიზაციო კომისიამ პირველი სამუშაო შეხვედრა გამართა. კომისია, რომელიც საპარლამენტო უმრავლესობის და უმცირესობის წევრებით, არასამთავრობო ორგანიზაციის წარმომადგენლებით და ექსპერტ-სპეციალისტებით არის დაკომპლექტებული, საქართველოს კონსტიტუციაში ორი სხვადსხვა ცვლილების საზოგადოებისთვის გაცნობის მიზნით, პარლამენტის დადგენილებით შეიქმნა.
კომისიის წევრთა გადაწყვეტილებით საქართველოს სხვადასხვა ქალაქებში ორივე საკონსტიტუციო ცვლილების სახალხო-საყოველთაო განხილვა ერთდროულად მოხდება. სხდომაზე კომისიის წევრმა, იურიდიულ საკითხთა კომიტეტის თავმჯდომარემ, ვახტანგ ხმალაძემ რეგიონებში გასვლითი შეხვედრების გრაფიკი წარმოადგინა. კომისია პირველ საჯარო განხილვას 15 იანვარს ზუგდიდში გამართავს და საკონსტიტუციო ცვლილებებს სამეგრელოს მოსახლეობას წარუდგენს. გრაფიკის მიხედვით, შეხვედრები შემდეგნაირად გადანაწილდა: 17 იანვარი - ქუთაისი, 22 იანვარი - თბილისი, 23 იანვარი - ოზურგეთი და ბათუმი, 24 იანვარი - გორი, 25 იანვარი - რუსთავი და თელავი, 26 იანვარი - ახალციხე. კომისიის წევრები საინფორმაციო შეხვედრას ცალკე ჟურნალისტებთანაც გამართავენ.
საჯარო-საყოველთაო განხილვების დასრულების შემდეგ, 4 თებერვლისთვის საკონსტიტუციო ცვლილებების პაკეტი პარლამენტს წარედგინება.
