პარლამენტის ვიცე-სპიკერმა მანანა კობახიძემ პარლამენტში ინიცირებულ საკონსტიტუციო ცვლილებებთან დაკავშირებით განმარტება გააკეთა და აღნიშნა, რომ პარლამენტში ინიცირებული კანონპროექტი აუცილებელი იმისთვის, რომ ქვეყანაში არ შეიქმნას პოლიტიკური კრიზისი.
,,ცვლილებების ინიცირება დაკავშირებულია იმ პრობლემებთან რაც უკავშირდება ხელისუფლების დანაწილებასა და ძალთა ბალანსს _ ერთი მხრივ პარლამენტს, მეორე მხრივ პრეზიდენტსა და მთავრობას შორის. 2013 წლის ოქტომბრამდე სანამ ამოქმედდება საკონსტიტუციო ნორმები რომელიც ჯერჯერობით არ მოქმედებს და რომელიც დააბალანსებს პრეზიდენტის ხელისუფლებას, იქამდე იქმნება პოლიტიკური კრიზის საფრთხე და საშიშროება. იმისთვის, რომ კრიზისი დაძლეული იქნას და ბალანსი იყოს დაცული პარლამენტსა და პრეზიდენტს შორის აუცილებელია ამგვარი ცვლილებების ინიცირება", -განაცხადა მანანა კობახიძემ.
შეგახსენებთ, რომ იუსტიციის სახლში საყოველთაო სახალხო განხილვის კომისიის პირველი სხდომა მიმდინარეობს სადაც პარლამენტში ინიცირებულ საკონსტიტუციო ცვლილებებს განიხილავენ. კერძოდ, კონსტიტუციიდან 42-ე პრიმა მუხლის ამოღების ინიციატივას, რომლის თანახმადაც, საკანონმდებლო ორგანოს ადგილმდებარეობად მხოლოდ ქალაქი ქუთაისია მინიშნებული. კომისია ასევე განიხილავს პრეზიდენტისათვის მთავრობის ერთპიროვნულად დანიშვნის უფლებამოსილების გაუქმების ინიციატივას.