აჭარაში მეციტრუსები 1 კილო მანდარინში რეალურად 60-დან 75 თეთრამდე იღებენ. როგორც სააგენტო „ჯი-ეიჩ-ენთან" საუბრისას, აჭარის სოფლის მეურნეობის მინისტრმა ზაურ ფუტკარაძემ განმარტა, მანდარინის ღირებულება 45 თეთრიდან 60 თეთრამდეა, რასაც ბიუჯეტიდან გამოყოფილი თანხებიც ემატება და რეალურად მანდარინის ღირებულება ფერმერისთვის 15 თეთრით იზრდება.
აჭარის სოფლის მეურნეობის მინისტრის განმარტებით, ამ დროისათვის რეგიონში მოწეული ციტრუსის 60 %-ი უკვე რეალიზებულია.
„წელს მთლიანობაში 53-55 ათასი ტონა მოსავალი იქნება, საიდანაც 60 %-ზე მეტი უკვე რეალიზებულია. ანუ ფაქტობრივად 32-40 ათასი ტონა ციტრუსი ფაქტობრივად უკვე გაყიდულია. პრეზიდენტიდან წამოვიდა ტყუილების კასკადი. წლების განმავლობაში პრეზიდენტიდან მოდიოდა, რომ არა მარტო ციტრუსისთვის, ასევე სოფლის მეურნეობის სხვა პროდუქციისათვის რუსეთის ბაზარი იყო ჩაკეტილი. მადლობა ღმერთს, რომ სასიკეთო ნაბიჯები იდგმება ჩვენი ხელისუფლების მიერ, რაც მეტყველებს იმაზე, რომ არამარტო ციტრუსი, არამედ საუბარია ღვინის, მინერალური წლების რუსეთში გატანაზე"- აცხადებს მინისტრი პრეზიდენტის საპასუხოდ, რომელმაც დღეს განაცხადა, რომ რუსეთის ბაზრის გახსნას ახალი მთავრობა "საკუთარ მიღწევად ასაღებს", მაშინ როდესაც მსოფლიო სავაჭრო ორგანიზაციაში მიღწეული შეთანხმების შესაბამისად, რუსული ბაზარი წელს ისედაც უნდა გახსნილიყო.
„ვიმედოვნებ, რომ ამ სეზონზე მოესწრება რუსეთის ბაზარზე ქართული პროდუქციის მიწოდება.
გასულ წელს უამინდობის გამო ციტრუსის მოსავალი დაზიანდა და მთელი წლის განმავლობაში სეზონზე 11 ათასი ტონა ციტრუსია ექსპორტირებული. წელს კი 40 ათას ტონამდე საექსპორტო პროდუქცია გვექნება. რაც შეეხება ფასს, წელს მანდარინის ფასი 45-60 თეთრია. ბიუჯეტიდან გამოყოფილი იქნა მოსახლეობის დასახმარებლად 1,5 მლნ ლარი და ჩვენი გადაწყვეტილებით ერთ კილოგრამზე, დანამატი განისაზღვრა 15 თეთრით. ანუ 45-60 თეთრს დაემატება 15 თეთრი, რაც ბიუჯეტი იქნა გამოყოფილი"- აცხადებს ზაურ ფუტკარაძე.
მინისტრის თქმით, ციტრუსის რეალიზაციას საფრთხე არ ემუქრება და რეგიონში მოწეული ციტრუსი აუცილებლად მთლიანად იქნება რეალიზებული. გარდა საექსპორტო პროდუქციისა, მინისტრის განმარტებით იანვრიდან ციტრუსის ჩაბარებას დაიწყებენ „ციტრო" და „ნარინჯი".
მინისტრის თქმით, „ნარინჯში" ახალი ინვესტორია და არსებობს დაპირება, რომ იანვარში ჩაბარების დაწყებას მოახერხებენ.
„ნარინჯი" გაიყიდა, საწამოში შემოვიდნენ ინვესტორები და ეს ინვესტორი გვპირდება, რომ 13 იანვრისთვის საწარმო დაიწყებს მუშაობას. რაც შეეხება „ციტროს" ის იანვრიდან 300-400 ტონა პროდუქციას ჩაიბარებს"- აცხადებს მინისტრი.
აღსანიშნავია, რომ ქართული ციტრუსი, სხვა ქვეყნის გავლით, რუსულ ბაზარზე უკვე შევიდა. თუმცა ამჯერად მიმდინარეობს მოლაპარაკებები რუსეთის ბაზრის გახსნაზე და ქართული პროდუქციის პირდაპირ რუსეთში გატანაზე.
შეგახსენებთ, რომ დღეს საქართველოს პრეზიდენტი ბათუმის საკრებულოს წევრებს შეხვდა და ციტრუსის რეალიზების შესახებ ინფორმაცია მათგან მიიღო. მიხეილ სააკაშვილმა განაცხადა, რომ რუსეთის ბაზრის გახსნას ახალი მთავრობა "საკუთარ მიღწევად ასაღებს", მაშინ როდესაც რუსული ბაზარი მსოფლიო სავაჭრო ორგანიზაციაში მიღწეული შეთანხმების შესაბამისად წელს ისედაც უნდა გახსნილიყო.
