იუსტიციის მინისტრი თეა წულუკიანი ზუგდიდის მაჟორიტარ დეპუტატს როლანდ ახალაიასა და ,,ნაციონალური მოძრაობის" დეპუტატს დავით საყვარელიძეს კანონის დაცვისკენ მოუწოდებს, _ აღნიშნულის შესახებ წულუკიანმა ჟურნალისტებთან განაცხადა და აღნიშნა, რომ დეპუტატების დაკითხვაზე დაბარება არ უკავშირდება მათ სადეპუტატო საქმიანობას.
,,წუწუნს იმასთან დაკავშირებით, რომ დაკითხვაზე ისე კი არ მოვალთ და ასე კი არ გავცემთ შეკითხვებს პასუხს, არამედ საჯაროდ _ ,,სკაიპით", ,,ფეისბუკით" ან ,,ტვიტერით" ასეთი რამ კანონში არ წერია და ეს ისმის იმ ადამიანებისგან, რომლებიც მიჩვეულები არიან საკუთარ თავზე მორგებულ კანონებს. კანონი არის ერთი ყველასთვის. დეპუტატს აქვს იმუნიტეტი, მაგრამ მას არ იცავს იმუნიტეტი დაკითხავზე მოწმის სახით არ გამოცხადდეს. ამიტომ მოვუწოდებ ბატონ ახალაიას, ბატონ საყვარელიძეს და სხვებს დაიცვან კანონი, რადგან ისინი იურისტები არიან და არცთუ უმნიშვნელო დაწესებულებებში მუშაობდნენ სხვადასხვა დროს", - განაცხადა ჟურნალისტებთან თეა წულუკიანმა და აღნიშნა, რომ საჯრო ფორმით მოწმის დაკითხვას კანონმდებლობა არ იცნობს.
შეგახსენებთ, რომ როლანდ ახალაია და დავით საყვარელიძე პროკურატურაში მოწმის სტატუსით დაკითხვაზე არიან დაბარებული, თუმცა დეპუტატები დაკითხვაზე მისვლას არ აპირებენ და მზად არიან საგამოძიებო სამსახურის წარმომადგენლების შეკითხვებს საჯაროდ უპასუხონ.
