2013 წლიდან, „აზიის განვითარების ბანკი" (ADB) საქართველოსთან მიმართებაში ახალ, შუალედურ სტრატეგიას აამოქმედებს. ახალი სტრატეგიის შემუშავებისას გათვალისწინებული იქნება, როგორც საქართველოს ეკონომიკური მდგომარეობა, ასევე ის მოთხოვნები და საჭიროებები, რომელიც ქვეყანას უდგას. როგორც „აზიის განვითარების ბანკში" განმარტავენ, ახალი სტრატეგიის შემუშავებისთვის მოხდება ინტენსიური კონსულტაციები და შეხვედრები საქართველოს მთავრობასთან.
მიუხედავად იმისა, რომ „აზიის განვითარების ბანკი" საქართველოში მხოლოდ 2007 წლიდან მოქმედებს, პარტნიორული ურთიერთობები სწრაფად განვითარდა და „აზიის განვითარების ბანკის" პორთფელი და დაფინანსება სწრაფად იზრდება.
როგორც „აზიის განვითარების ბანკში"- განმარტავენ, ბანკის ყველა საქმიანობა სრულად არის კოორდინირებული საქართველოს მთავრობისა და განვითარების დამფინანსებელ ორგანიზაციებთან.
„2008 წელს დამტკიცებული შუალედური სამოქმედო სტრატეგია წარმართავს „აზიის განვითარების ბანკის" ინვესტიციებს ქვეყანაში, მანამ ვიდრე ძალაში არ შევა ქვეყანასთან პარტნიორობის ახალი სტრატეგია 2013 წელს"- აცხადებენ „აზიის განვითარების ბანკში".
„აზიის განვითარების ბანკის" საქართველოს წარმომადგენლობაში აცხადებენ, რომ ქვეყნის ეკონომიკა მომავალ წელს 6%-ზე მეტად გაიზრდება.
„აზიის განვითარების ბანკის" მუდმივი წარმომადგენელი საქართველოში ქეითი ჯულიანი განმარტავს, რომ ბანკს პროგნოზი ოქტომბრის შემდეგ არ განუახლებია და იგი უცვლელია.
„აზიის განვითარების ბანკის" ინფორმაციით, ბანკმა ქვეყანას 1 მლრდ დოლარზე მეტი სესხი დაუმტკიცა, საიდანაც ბანკს 437 მლნ დოლარი უკვე გაცემული აქვს. მთლიანობაში ბანკის მიერ დამტკიცებულია 17 პროექტი, საიდანაც 8 პროექტი მიმდინარეა.
„აზიის განვითარების ბანკში" აცხადებენ, რომ ბანკის აქტიურმა პორთფელმა, 8 პროექტზე, 581,8 მლნ დოლარი შეადგინა, საიდანაც ქვეყანამ 441,8 მლნ. ლარი უშუალოდ აზიის განვითარების ფონდიდან მიიღო, ორდინალური კაპიტალურმა რესურსებმა კი 140 მლნ დოლარი შეადგინა.
ხოლო დარჩენილი 9 პროექტი კი ტექნიკური დახმარების პროექტია.
