მთავრობა მონოპოლიების წინააღმდეგ აქტიურდება. მცირე ბიზნესის დასახმარებლად და მათი პრობლემების შესასწავლად, ეკონომიკისა და მდგრადი განვითარების სამინისტროში სპეციალური ცხელი ხაზი ამოქმედდა.
"მიმართვის ადრესატი მცირე და საშუალო ბიზნესის ყველა ის წარმომადგენელია, ვინც სხვადასხვა კარტელური შეთანხმების გამო ვერ ახერხებს, ფეხი მოიკიდოს და აწარმოოს ბიზნესსაქმიანობა საქართველოს ბაზრებზე. მცირე და საშუალო ბიზნესი ათობით ათასი ჩვენი თანამოქალაქისთვის წლების განმავლობაში ძირითადი შემოსავლის წყარო იყო. დღეს ეს ხალხი მიზანმიმართულად შექმნილი მონოპოლიებისა თუ სხვადასხვა კარტელური შეთანხმების გამო ან უსახსროდ დარჩა, ან იძულებული გახდა სახელმწიფო სექტორში დასაქმებულიყო", - აცხადებს ეკონომიკისა და მდგრადი განვითარების მინისტრი გიორგი კვირიკაშვილი.
მინისტრის განმარტებით, ხელისუფლების მიზანია, მცირე ბიზნესი წახალისდეს.
"ჩვენი მიზანია, სტიმული მივცეთ და სამეწარმეო მუხტი გავუღვიძოთ მათ, ვისაც კვლავ აქვს ბიზნესის წარმოების სურვილი და საშუალება. ამ მიზნით, 24 დეკემბრიდან, ეკონომიკისა და მდგრადი განვითარების სამინისტროში ამოქმედდება ანტიმონოპოლიური ცხელი ხაზი. ნებისმიერ მეწარმეს შეუძლია დარეკოს შემდეგ ნომრებზე: 299 10 02; 299 10 03; 299 10 04. სამწუხაროდ, მონოპოლიურ ეკონომიკას დიდი ინერცია აქვს, ჩვენი მიზანია, უმოკლეს დროში დავძლიოთ ეს ინერცია და კონკურენტული გარემოს ჩამოყალიბება მოვახერხოთ. ვიდრე დღეს არსებული კარტელური ურთიერთობები არ მოშლილა და არ შექმნილა კონკურენციის სააგენტო, ეკონომიკისა და მდგრადი განვითარების სამინისტროში შეიქმნება ჯგუფი, რომელსაც პირადად მე ვუხელძღვანელებ", - განმარტავს კვირიკაშვილი.
მინისტრის თქმით, საქმე ეხება არა კომპანიებისთვის ფინანსურ დახმარებას, არამედ საუბარია მხოლოდ იმ ბიზნესმენების მხარდაჭერაზე, რომელთაც უკვე აქვთ საკუთარი ფინანსური წყარო ან საბანკო რესურსი და სურვილი აქვთ, საქმიანობა კანონიერი გზით დაიწყონ ან განაახლონ.
