პრეზიდენტს აქვს უფლება გამოიყენოს ვეტოს უფლება, მაგრამ ის უნდა იყოს დასაბუთებული, - ასე პასუხობს საპარლამენტო უმრავლესობის წევრი, იურიდიულ საკითხთა კომიტეტის თავმჯდომარე ვახტანგ ხმალაძე პრეზიდენტის განცხადებას, რომელმაც გუშინ გამართულ საგანგებო ბრიფინგზე განაცხადა, რომ "საერთო სასამართლოების შესახებ" კანონპროექტს ვეტოს დაადებს თუ იმ ფორმით დამტკიცდება, რა ფორმითაც ახლაა.
ხმალაძის თქმით, პრეზიდენტმა ვეტოს დადების შემთხვევაში უნდა წარმოადგინოს მოსაზრებები.
"ამის შემდეგ პარამენტმა კენჭი უნდა უყაროს პრეზიდენტის შენიშვნებს თუ არ მიიღო, მაშინ კენჭი უნდა უყაროს პარლამენტმა ვეტოს დაძლევას. ვეტოს დაძლევას სჭირდება გარკვეული უმრავლესობა. ასეთი უმრავლესობა საპარლამენტო უმრავლესობას არ აქვს. თუ მას არ დაუჭირა მხარი ოპოზიციის ნაწილმა მაშინ ვეტო ვერ იქნება დაძლეული", - განაცხადა ხამალაძემ.
პრეზიდენტმა "საერთო სასამართლოების შესახებ" კანონპროექტთან დაკავშირებით განაცხადა, რომ მისი მირების შემთხვევაში "სასამართლო ინსტიტუტი მთლიანად აღმოჩნდეს დამოუკიდებლობის გარეშე".
"ახლა არის საერთო სასამართლოების შესახებ კანონი შეტანილი, რომლის თანახმადაც, იუსტიციის საბჭო და სასამართლო ხელისუფლება მთლიანად მოექცევა აღმასრულებელი ხელისუფლების კონტროლის ქვეშ, უკვე ფორმალურადაც. საუბარია იმაზე, რომ რომც მოინდომონ მოსამართლეებმა წინააღმდეგობის გაწევა პროკურატურისადმი, პრემიერ-მინისტრისადმი, იუსტიციის სამინისტროსადმი, ამის ფორმალური საშუალებაც აღარ ექნებათ. მინდა ვუთხრა პარლამენტის წევრებს, მათ იციან, რომ ვენეციის კომისიამ მოითხოვა ამ კანონპროექტის განხილვის გადადება, მაგრამ თუ კანონპროექტი დარჩება დღევანდელი სახით, მე გამოვიყენებ პრეზიდენტის უფლებას და ამ კანონპროექტს დავადებ ვეტოს. ეს იქნება დამოუკიდებელი სასამართლო ინსტიტუტის დასამარება ერთხელ და სამუდამოდ საქართველოში და ამ შემთხვევაში მოქალაქეებს აღარაფრის იმედი აღარ ექნებათ", - განაცხადა პრეზიდენტმა.
მისივე თქმით, საქართველო არის იმ საფრთხის წინაშე, რომ სასამართლო ინსტიტუტი მთლიანად აღმოჩნდეს დამოუკიდებლობის გარეშე.
"ჩვენ კარგად ვიცით, რომ პროკურატურას სჭირდება სასამართლოსგან, მიუხედავად იმისა, რომ საქმეებს, რომლებსაც ისინი წარადგენენ არის სამარცხვინო და ძალიან სუსტი, დაპატიმრების სანქცია. მათ სჭირდებათ, რომ ყველა, ვინც მიდის სასამართლოში, იქნას დაპატიმრებული. მინდა ვთქვა, რომ ეს არის სასამართლო ხელისუფლებაზე ზეწოლის წარმოუდგენელი ფაქტი. ამის პარალელურად მოხდა უზენაესი სასამართლოს წევრების და იუსტიციის საბჭოს ყოფილი წევრების დაბარება იმ საქმეებზე, რომელიც არ უკავშირდება პირდაპირ მათ სასამართლო საქმიანობას, მაგრამ უკავშირდება წინა წლების ფაქტებს. ეს ყველაფერი მოჰყვა პირდაპირ მუქარას იუსტიციის მინისტრის და სხვა თანამდებობის პირების მიერ მოსამართლეების მიმართ. ერთი სიტყვით, ჩვენ ვართ იმ საფრთხის წინაშე, რომ საქართველოში სასამართლო ინსტიტუტი მთლიანად აღმოჩნდეს დამოუკიდებლობის გარეშე", - განაცხადა მიხეილ სააკაშვილმა.
პარლამენტმა დღეს, პირველი მოსმენით - პრინციპების დონეზე, სასამართლოებთან დაკავშირებით იუსტიციის სამინისტროს მიერ შეთავაზებული საკანონმდებლო პაკეტი დაამტკიცა. ცვლილებები "საერთო სასამართლოების შესახებ", "საერთო სასამართლოების მოსამართლეთა დისციპლინარული სამართალწარმოების შესახებ", "იუსტიციის უმაღლესი საბჭოს შესახებ" კანონებში და "სისხლის სამართლის საპროცესო კოდექსში" აისახება.
