ნიუ იორკში უკრაინის პრეზიდენტ ვოლოდიმირ ზელენსკისა და ევროკომისიის პრეზიდენტ ურსულა ფონ დერ ლაიენის შეხვედრა დაძაბულ ვითარებაში გაიმართა. ამის შესახებ Bloomberg ინფორმირებულ წყაროზე დაყრდნობით წერს.

წყაროს ცნობით, შეხვედრაზე ზელენსკიმ და ფონ დერ ლაიენმა უკრაინისთვის შემდგომი ფინანსური და თავდაცვითი მხარდაჭერის საკითხები განიხილეს.

უკრაინულმა მხარემ, მათ შორის, შეშფოთება გამოთქვა ზამთარში რუსეთის მხრიდან თავდასხმების შესაძლო გაძლიერებისა და საჰაერო თავდაცვისთვის საჭირო რაკეტების დეფიციტის გამო.

Bloomberg-ის წყაროს ინფორმაციით, საუბრისას უკრაინულმა მხარემ ასევე უკმაყოფილება გამოხატა ევროკავშირის გადაწყვეტილების გამო, რომლის შედეგადაც რუსეთის ორი ოლიგარქი - ალიშერ უსმანოვი და მიხაილ ფრიდმანი  რუსეთის წინააღმდეგ მოქმედი სანქციების სიიდან ამოიღეს. ევროკავშირმა სანქციების მოქმედება კიდევ 36 თვით გაახანგრძლივა.

თავის მხრივ, ფონ დერ ლაიენმა შეხვედრის შემდეგ სოციალურ ქსელ X-ზე დაწერა, რომ ევროპა უკრაინის თავდაცვის გასაძლიერებლად უპრეცედენტო ძალისხმევას მიმართავს.

„ჩვენი ახალი სარაკეტო თავდაცვის პროგრამა ხელს შეუწყობს წარმოების მოცულობის სწრაფ ზრდას. უკრაინა კიდევ უფრო მეტ თავდაცვით მხარდაჭერას მიიღებს. და როგორც კი რეფორმები წინ წავა, ასევე გაიზრდება საბიუჯეტო მხარდაჭერაც. ამ კალენდარულ წელს ჩვენ ჯერ კიდევ გვაქვს 37 მილიარდი ევრო ხელმისაწვდომი“, – აღნიშნა ევროკომისიის პრეზიდენტმა.