2013 წლის სახელმწიფო ბიუჯეტის პრიორიტეტებია: ხელმისაწვდომი ჯანდაცვა და სოციალური უზრუნველყოფა; თავდაცვა, საზოგადოებრივი წესრიგი და უსაფრთხოება; რეგიონული განვითარება, ინფრასტრუქტურა და ტურიზმი; განათლება, მეცნიერება და პროფესიული მომზადება; მაკროეკონომიკური სტაბილურობა და საინვესტიციო გარემოს გაუმჯობესება; ინსტიტუციური განვითარება და ქვეყნის ინტერესების სამართლებრივი მხარდაჭერა; იძულებით გადაადგილებულ პირთა და მიგრანტთა სახელმწიფო მხარდაჭერა და რეინტეგრაციის ხელშეწყობა; კულტურა, რელიგია, ახალგაზრდების ხელშეწყობა და სპორტი; საერთაშორისო ურთიერთობები და ევროატლანტიკურ სივრცეში ორიენტაცია; სოფლის მეურნეობა; სასამართლო სისტემა; გარემოს დაცვა და ბუნებრივი რესურსების მართვა.

ბიუჯეტის მიხედვით, ახალი მთავრობის პრიორიტეტული სფეროების - ჯანდაცვის, განათლებისა და სოფლის მეურნეობის სამინისტროების დაფინანსება იზრდება. ხოლო შინაგან საქმეთა და თავდაცვის სამინისტროების დაფინანსება 15,2 მლნ და 30 მლნ ლარით მცირდება.

საბიუჯეტო სახსრები 7 971.0 მლნ ლარს შეადგენს, გრანტები - 127.5 მლნ ლარს და კრედიტები - 650.0 მლნ ლარს. სახელმწიფო ბიუჯეტის ხარჯების ჯამური მოცულობა 7 255.4 მლნ ლარია.

ბიუჯეტით 2013 წლის სახელმწიფო ბიუჯეტის შემოსავლების საპროგნოზო მაჩვენებელი 7 422.5 მლნ ლარია. ასევე, 2013 წელს სახელმწიფო ბიუჯეტის გადასახადების საპროგნოზო მაჩვენებელი 6 920.0 მლნ ლარით განისაზღვრა, რაც მთლიანი შიდა პროდუქტის 23.6%-ს შეადგენს. 2013 წლისათვის სახელმწიფო ბიუჯეტის "სხვა შემოსავლების" საპროგნოზო მაჩვენებელი 300.0 მლნ ლარის ოდენობით არის განსაზღვრული. დამტკიცებული ბიუჯეტით ჯანდაცვის სამინისტროს დაფინანსება 535.0 მლნ ლარით იზრდება და 2 მილიადრ 345 მილიონ ლარს გაუტოლდება.

მთავრობის მიერ მომზადებული ბიუჯეტით, ზოგადსაგანმანათლებლო დაწესებულების ვაუჩერული დაფინანსების მოცულობა იზრდება და 380.0 მლნ ლარს შეადგენს. აღნიშნული თანხის ფარგლებში, დაგეგმილია ყველა მასწავლებლისა და სკოლის ადმინისტრაციული პერსონალის ხელფასების ზრდა. საგანმანათლებლო დაწესებულებების მშენებლობა-რეაბილიტაციისათვის გათვალისწინებულია 60, 7 მლნ ლარი. ცალკე ქვეპროგრამის სახით, 5 მლნ ლარი გათვალისწინებულია მეცნიერების აღდგენისა და განვითარებისათვის. 2.6 მლნ ლარი გათვალისწინებულია იმ მოსწავლეების სკოლებში ტრანსპორტირებისათვის, რომელთაც სკოლების გეოგრაფიული მდგომარეობიდან გამომდინარე, შორი მანძილის დაფარვა უწევთ. ასევე, სტუდენტების სასწავლო გრანტები გაზრდილია 15.7 მლნ ლარით და 57.7 მლნ ლარს შეადგენს. ხოლო მლნ ლარი გათვალისწინებულია სადოქტორო პროგრამების დასაფინანსებლად.

რაც შეეება მთავრობის კიდევ ერთი პრიორიტეტულ სფეროს - სოფლის მეურნეობას, ბიუჯეტით, სასოფლო-სამეურნეო ტექნიკის განახლებისათვის გათვალისწინებულია 86 მლნ ლარი, სამელიორაციო სისტემების რეაბილიტაციისა და მათი ექსპლუატაციისთვის 64.4 მლნ ლარი. ხოლო რთველის ხელშეწყობის ღონისძიებებისთვის 25.0 მლნ ლარი.
ზემოთ აღნიშნულის გარდა, ბიუჯეტით, რეგიონული განვითარებისა და ინფრასტრუქტურის სამინისტროს ასიგნებებიდან 501, 7 მლნ ლარი მიიმართება საგზაო, ხოლო 181, 9 მლნ ლარი რეგიონული და მუნიციპალური ინფრასტრუქტურის რეაბილიტაციაზე.