პრეზიდენტმა 92 პატიმარი შეიწყალა, _ აღნიშნულის შესახებ ჟურნალისტებთან პრეზიდენტის პრესსპიკერმა მანანა მანჯგალაძემ განაცხადა. მისი თქმით, მიხეილ სააკაშვილმა იმ კატეგორიის მსჯავრდებულები შეიწყალა, რომლის გათავისუფლების რეკომენდაციითაც პრეზიდენტის ადმინისტრაციას რამდენიმე დღის წინ სასჯელაღსრულების, პრობაციისა და იურიდიული დახმარების მინისტრმა სოზარ სუბარმა მიმართა.
"საქმე ეხება მსჯავრდებულთა იმ ჯგუფს, რომელთა ჯანმრთელობის მდგომარეობა მძიმე, ან უკიდურესად მძიმეა. თავიდან 137 მსჯავრდებულზე იყო საუბარი, თუმცა გუშინ პრეზიდენტის ადმინისტრაციაში სასჯელაღსრულების სამინისტროდან დოკუმენტაცია 92 პატიმარზე შემოვიდა. პრეზიდენტმა დღეს ყველა მათგანის შეწყალების თაობაზე გამოსცა აქტი", - განაცხადა მანანა მანჯგალაძემ და აღნიშნა, რომ შეწყალებული პატიმრები ციხეებს დღეს დატოვებენ.
