საქართველოს სტატისტიკური სისტემის გლობალური შეფასების მიზნით, საქართველოს სტატისტიკის ეროვნულ სამსახურში ერთ კვირიანი ვიზიტით საერთაშორისო მისია იმყოფება. ეს რიგით მეორე ვიზიტია ამ მისიის ფარგლებში.
„საქსტატის" ინფორმაციით, მისიის შემადგენლობაში არიან როგორც საერთაშორისო ორგანიზაციების - ევროკომისიის (ევროსტატის) და გაეროს ევროპის ეკონომიკური კომისიის, ისე ევროკავშირის ცალკეული ქვეყნების სტატისტიკური უწყებების წარმომადგენლები.
მისიის მიზნებს წარმოადგენს საქართველოს სტატისტიკური სისტემის ევროპული სტანდარტებისადმი შესაბამისობის დონის განსაზღვრა.
წინა მისიის შეფასების შედეგების საფუძველზე შემუშავდა მოხსენების შუალედური ვერსია, რომელშიც ჩამოყალიბებულია რეკომენდაციები, რომელთა შესრულება ხელს შეუწყობს ქვეყნის სტატისტიკური სისტემის შემდგომ განვითარებასა და ევროპულ სტანდარტებთან მის დაახლოებას. საბოლოო მოხსენება, სადაც ხაზგასმული იქნება ძირითადი რეკომენდაციები, განთავსდება საქსტატის ვებ-გვერდზე და ხელმისაწვდომი იქნება ნებისმიერი მომხმარებლისთვის.
მისიის თბილისში ყოფნის დროს სამუშაო შეხვედრები გაიმართება სტატისტიკის ძირითად მწარმოებლებთან.
მასალის გამოყენების პირობები
