გარემოს დაცვისა და ბუნებრივი რესურსების კომიტეტის სხდომაზე წლის სახელმწიფო ბიუჯეტის შესახებ კანონში ცვლილების შეტანის შესახებ კანონპროექტი განიხილეს. ფინანსთა მინისტრის მოადგილემ, დავით ებრალიძემ, დეპუტატებს მიმდინარე წლის ბიუჯეტში განსახორციელებელი ცვლილებების პარამეტრები წარუდგინა, რაც საქართველოში არსებული ზოგადი სოციალურ-ეკონომიკური მდგომარეობითაა გამოწვეული.
ებრალიძის განმარტებით, კანონპროექტის მიზანს 2012 წლის სახელმწიფო ბიუჯეტის შემოსულობებისა და გადასახდელების დაზუსტება წარმოადგენს.
შემოსულობების ნაწილში ცვლილებები სხვადასხვა საინვესტიციო პროექტის ათვისების ტენდენციის გათვალისწინებით გრძელვადიანი კრედიტების შემცირებასთანაა დაკავშირებული. ამასთანავე, ხორციელდება შემოსულობების სხვადასხვა კატეგორიის კორექტირება და ბიუჯეტში აისახება წლის განმავლობაში სხვადასხვა დონორი ორგანიზაციისგან მიღებული მიზნობრივი გრანტები.
მისი თქმით, ბიუჯეტის ხარჯვითი ნაწილის კორექტირება სხვადასხვა სამინისტროს ზოგიერთი პროგრამის დეფიციტის დაფინანსებას უკავშირდება.
"მოძიებული თავისუფალი რესურსი მიმდინარე წელს ერთ-ერთ პრიორიტეტს, სოფლის მეურნეობას დამატებით დააფინანსებს", - განაცხადა ებრალიძემ. პროექტის მიხედვით, სახელმწიფო ბიუჯეტის შემოსულობები 8 მლრდ. 158 მლნ. ლარით განისაზღვრება, რაც დამტკიცებულზე 84 მლნ. ლარით ნაკლებია. წარმოდგენილი ცვლილებები მთლიანობაში გავლენას არ მოახდენს საბიუჯეტო დეფიციტის მაჩვენებელზე და ნაერთი ბიუჯეტის დეფიციტი მშპ-სთან მიმართებაში 3,5%-ის ფარგლებშია დაგეგმილი, ეკონომიკის რეალური ზრდა კი 7%-ის ფარგლებშია მოსალოდნელი.
კომიტეტის წევრებმა მიზანშეწონილად მიიჩნიეს საკითხის პლენარულ სხდომაზე გატანა.
