საქართველოში სახელმწიფო ფინანსების მართვის რეფორმის (PFM) კუთხით არსებული მდგომარეობა იყო დღეს ფინანსთა მინისტრისა და ევროკავშირის წარმომადგენლობის ხელმძღვანელის ფილიპ დიმიტროვის შეხვედრის მთავარი მიზანი. შეხვედრას ესწრებოდნენ აღმოსავლეთ სამეზობლოს გეოგრაფიული კოორდინირების განყოფილების ხელმძღვანელი ანდრეა ფონტანა, ევროპის დახმარების სამსახურის ოფიცერი თანამშრომლობის სფეროში ინგრიდ შვაიგერი და ოფიცერი პოლიტიკის საკითხებში პიერ დიუბმანი.
"შედგა საკმაოდ საინტერესო შეხვედრა. სახელმწიფო ფინანსების მართვის პროგრამა ითვალისწინებს ბიუჯეტის გამჭვირვალეობას, საჯარო ფინანსების მართვის სრულყოფას. აღნიშნული პროექტი მომავალშიც გაგრძელდება. ვისაუბრეთ 2014-2017 წლების გეგმებზე, მათ შორის, სამი ძირითადი მიმართულებით: პირველი შეეხება ბიუჯეტის ეფექტიანობის ზრდას, მის გამჭვირვალობას, მეორე ესაა ფისკალური დეცენტრალიზაცია - ადგილობრივი თვიმმართველობების უზრუნველყოფა საკუთარი ფულადი შემოსავლებით და მესამე - კორუფციის წინააღმდეგ ბრძოლა. ყველა ეს მიმართულება ჩვენთვის ძალიან პრიორიტეტულია", - განაცხადა ფინანსთა მინისტრმა ნოდარ ხადურმა.
მისი თქმით, დაწყებულია ფინანსთა სამინისტროს განვითარების სტრატეგიაზე მუშაობა.
"მივიღეთ დაპირება, რომ ევროკავშირი დაგვეხმარება ამ პროცესში, რათა ფინანსთა სამინისტრომ შეიმუშაოს გრძელვადიანი განვითარების პროგრამა. მომავალ წელს შევძლებთ ჩამოვაყალიბოთ სერიოზული ხედვა ქვეყნის ეკონომიკისა და საბიუჯეტო პროცესის განვითარების შესახებ", - განაცხადა ხადურმა.
"ევროკავშირის მხრიდან ჩამოსული მისიის ძირითადი მიზანი იყო საქართველოში არსებული სიტუაციის გაცნობა. ასევე, 2014-2017 წლებისთვის საქართველოსა და ევროკავშირს შორის თანამშრომლობის დაგეგმვა. შეხვედრაზე მოვისმინეთ ქართული მხარის ხედვა სამომავლო პროექტებზე, რომელთა ირგვლივ მოლაპარაკებების შედეგად დაიგეგმება ჩვენი ახალი სტრატეგია", - აღნიშნა ევროკავშირის წარმომადგენლობის ხელმძღვანელმა ფილიპ დიმიტროვმა.
