ამერიკის შეერთებულ შტატებში ვიზიტად მყოფი საქართველოს საგარეო საქმეთა მინისტრი, მაია ფანჯიკიძე აშშ-ის სახელმწიფო მდივანს, ჰილარი კლინტონს შეხვდა. შეხვედრის დაწყებამდე, ჰილარი კლინტონმა კომენტარი გააკეთა და განაცხადა, რომ ბოლო საპარლამენტო არჩევნები საქართველოსთვის დემოკრატიისკენ კიდევ ერთი წინგადადგმული ნაბიჯია.
კლინტონის თქმით, აშშ ხელისუფლების მშვიდობიან გადაბარებას საქართველოში, მხარს უჭერს.
ამერიკის შეერთებული შტატების სახელმწიფო მდივანმა საქართველოში მიმდინარე გამოძიებებთან დაკავშირებითაც გააკეთა კომენტარი და იმედი გამოთქვა, რომ მათ მიმართ, ვინც შესაძლო დამნაშავეა, ყველა ღონისძიება კანონიერად და შესაბამისი პროცედურების დაცვით ჩატარდება.
მაია ფანჯიკიძემ ჰილარი კლინტონს მოწვევისთვის მადლობა გადაუხადა და აღნიშნა, რომ საქართველო ამაყობს აშშ-სთან პარტნიორობით და მისი დახმარების და თანადგომის იმედი აქვს.