საგარეო საქმეთა მინისტრის პირველმა მოადგილემ, დავით ზალკანიანმა, ქ. ბრიუსელში სამუშაო ვიზიტის ფარგლებში, 26 და 27 ნოემბერს, შეხვედრები გამართა ევროპული საგარეო ქმედებათა სამსახურის ევროპისა და ცენტრალური აზიის საკითხებში მმართველ დირექტორთან, ლუის ფერნანდეს დე ლა პენიასთან; ევროკომისიის საშინაო საქმეთა გენერალური დირექტორატის ხელმძღვანელთან, სტეფანო მანსერვისისთან და საშინაო საქმეთა ევროკომისრის, სესილია მალმსტრომის კაბინეტის დირექტორის მოადგილესთან, ლორან მუშელთან.
საგარეო საქმეთა სამინისტროს ინფორმაციით, მინისტრის მოადგილემ ასევე შეხვედრა გამართა ევროკავშირში წევრი ქვეყნების წარმომადგენლებთან პოლიტიკური და უსაფრთხოების კომიტეტის დონეზე. შეხვედრებზე განხილულ იქნა საქართველოსთვის მნიშვნელოვანი საკითხების ფართო სპექტრი, მათ შორის, თანამშრომლობის პრიორიტეტული მიმართულებები, როგორიც არის მიმდინარე მოლაპარაკებები ასოცირების შესახებ შეთანხმებაზე, ღრმა და ყოვლისმომცველი თავისუფალი სავაჭრო სივრცის ჩათვლით; სავიზო რეჟიმის ლიბერალიზაცია; საქართველოს მონაწილეობა ევროკავშირის კრიზისის მართვის ოპერაციებში; ევროკავშირის მხარდაჭერა საქართველოში სტაბილიზაციისა და უსაფრთხოების კუთხით და სხვა. დიდი ყურადღება დაეთმო ამ მიმართულებებით სამომავლო გეგმების განსაზღვრას, განსაკუთრებით 2013 წლის შემოდგომაზე დაგეგმილ, "აღმოსავლეთ პარტნიორობის" მესამე, ვილნიუსის სამიტამდე.
