რუსი ბიზნესმენის ალექსანდრ პერეპილჩნის გარდაცვალების შესახებ ინფორმაციას ინგლისური პრესა ავრცელებს. ბიზნესმენი ე.წ. მაგნიტსკის საქმის მთავარი მოწმე იყო და ის გაურკვეველ ვითარებაში, საკუთარი სახლის სიახლოვეს, ინგლისში, სურეის საგრაფოში დაიღუპა.
გაზეთი „The independent" - ის ცნობით, 44 წლის ბიზნესმენმა, პოლიტიკური თავშესაფარი დიდ ბრიტანეთში 2009 წელს მიიღო. გარდაცვლილის გვამის დათვალიერების შემდეგ, პოლიციამ საბოლოო დასკვნები ვერ გააკეთა, თუმცა, სავარაუდოდ, მისი გარდაცვალება ძალადობრივი გზით არ მოხდა. გაზეთი, ასევე, წერს, რომ ბიზნსმენი უკვე მეოთხე ადამიანია, რომელიც ამ საქმესთან იყო დაკავშირებული და მოულოდნელად დაიღუპა.
როგორც ცნობილია, იურისტმა სერგეი მაგნიტსკიმ, რუსეთის შსს-ს მაღალჩინოსნების წინააღმდეგ, მნიშვნელოვანი დოკუმენტები მოიპოვა, სადაც ის ჩინოვნიკების კორუფციულ საქმიანობას ამხელდა. თუმცა, მაგნიტსკი თავად დააპატიმრეს, რის შემდეგაც იგი საკანში, გაურკვეველ ვითარებაში გარდაიცვალა. დასავლეთმა რუსეთის ხელისუფლება იურისტის მკვლელობაში დაადანაშაულა და რუსი ჩინოვნიკების წინააღმდეგ სანქციები დააწესა.
