დღეს, 28 ნოემბერს, 11:00 საათზე საქართველოს სოფლის მეურნეობის მინისტრი დავით კირვალიძე სოფლის მეურნეობის საერთაშორისო გამოფენას გახსნის. როგორც სააგენტო "ჯი-ეიჩ-ენს" გამოფენის ორგანიზატორებმა აცნობეს, 28 ნოემბრიდან 1-ელ დეკემბრამდე, გამოფენების ცენტრ "ექსპო ჯორჯიას" ტერიტორიაზე, მე-11 პავილიონში და ღია სივრცეში, სოფლის მეურნეობის, კვების მრეწველობის, გადამამუშავებელი და შესაფუთი ტექნოლოგიების მე-12 საერთაშორისო გამოფენა გაიმართება.
ქართულ კომპანიებთან ერთად მონაწილეობენ კომპანიები შემდეგი ქვეყნებიდან: გერმანია, ლიტვა, ავსტრია, კანადა, ესპანეთი, უკრაინა, რუსეთი, თურქეთი, ირანი, სომხეთი.
გამოფენაზე წარმოდგენილი იქნებიან კომპანიები შემდეგ კატეგორიებში: სასოფლო-სამეურნეო ტექნიკა, მანქანა-დანადგარები, ტარა და შესაფუთი მასალები, სასათბურე და სამავიცრე მეუნეობები, სარწყავი სისტემები, სასმელები და საკვები პროდუქტები(რძის პროდუქტები, ჩაი, ჯემები), ლაბორატორიული აღჭურვილობა, ნერგები, თესლები, სასუქები და პესტიციდები, საკონსულტაციო სერვისი და სატრანსპორტო მომსახურება.
როგორც გამოფენის ორგანიზატორები განმარტავენ, დამთვალიერებელს მიეცემა საშუალება უშუალოდ მწარმოებლებისგან მიიღოს სასურველი ინფორმაცია და გაეცნოს ინდუსტრიაში მიმდინარე სიახლეებს. რეგიონებში მაცხოვრებელი ფერმერებისა და წვრილი მეწარმეებისთვის დაინიშნება სპეციალური ავტობუსები, რომლების უზრუნველყოფენ უფასო გადაადგილებას.
გამოფენაზე წარმოდგენილი იქნება ქართული ბაზრისთვის უცნობი კომპნიებიც, რომლებიც ეძებენ დისტიბუტორებსა და წარმომადგენლობებს.
