სირიის ოპოზიციის წარმომადგენლები აცხადებენ, რომ სამთავრობო ჯარების ვერტმფრენმა საბავშვო მოედანზე კასეტური ბომბი ჩამოაგდო, რის შედეგადაც 10 ბავშვი დაიღუპა. ინფორმაციას ამის შესახებ "ბი-ბი-სი" ავრცელებს. ამასთან, ინტერნეტში განთავსებულია ვიდეო, რომელზეც ჩანს, თუ როგორ დასტირიან დედები ბავშვებს.
აღნიშნული ინციდენტი, ოპოზიციის წარმომადგენლების თქმით, სოფელ დეიპ ალ-ასაფირში მოხდა, რომელიც დამასკოდან აღმოსავლეთით მდებარეობს.
ამავდროულად, საერთაშორისო წითელმა ჯვარმა განაცხადა, რომ ისინი ამ ფაქტს ვერ დაადასტურებენ, ვინდაიდან ამის შესახებ ინფორმაცია არ აქვთ.
მიუხედავად ამისა, ოპოზიცია ამტკიცებს, რომ სოფელზე ორი კასეტური ბომბი ჩამოაგდეს.
კასეტური ბომბის ჩამოდგებაზე საბავშვო მოედანზე ასევე წერს "როიტერი".
სააგენტოსთან საუბარში სირიის ოპოზიციის წარმომადგენელი აბუ კასიმი აცხადებს, რომ "ყველა დაღუპული ბავშვია 15 წლამდე ასაკის". მისივე თქმით, დაჭრილია 15 ადამიანი.
აღსანიშნავია, რომ უფლებების დამცავი ორგანიზაცია Human Rights Watch -ი აცხადებს, რომ ბოლო დროს ფაქტები იმისა, რომ სირიაში კასეტურ ბომბებს იყენებენ სულ უფრო იზრდება.
ამავდროულად, ბაშარ ასადის მთავრობის წარმომადგენლები აცხადებენ, რომ მათ კასეტური ბომბები არ აქვთ.
აღსანიშნავია, რომ სირიის დედაქალაქის ირგვლივ ბრძოლები ამჟამადაც გრძელდება.
