დღეს, 27 ნოემბერს, საქართველოს პრეზიდენტი მიხეილ სააკაშვილი უკრაინას ეწვევა. სააკაშვილი მონაწილეობას მიიღებს არსენ იაცენიუკის ფონდის "აღმოაჩინე უკრაინას" დიპლომატიურ კლუბში. ამის შესახებ ინფორმაციას თავად იაცენიუკის პარტიის პრესამსახური ავრცელებს.
"ფონდი "აღმოაჩინე უკრაინა" ატარებს მორიგ დიპლომატიურ კლუბს და მასში მონაწილეობას თავად ფონდის დამფუძნებელი და საქართველოს პრეზიდენტი მიხეილ სააკაშვილი მიიღებენ", - აცხადებენ კლუბის ორგანიზატორები.
აღნიშნული ღონისძიების თემააა "რეგიონი გზაჯვარედინზე: ევროპული პერსპექტივა საქართველოსა და უკრაინისთვის".
სააკაშვილი და იაცენიუკი ყურადღებას გაამახვილებენ საქართველოსა და უკრაინის ურთიერთობებზე ევროკავშირთან და ასევე თავად ევროპის როლზე ამ სახელმწიფოების განვითარებაში.მათი გამოსვლების შემდეგ კი დაგეგმილია დისკუსია.
