ფინანსთა მინისტრმა ნოდარ ხადურმა და საქართველოში თურქეთის ელჩმა ლევენთ მურათ ბურჰანმა შეხვედრის დროს საქართველოსა და თურქეთს შორის სავაჭრო-ეკონომიკური თანამშრომლობის საკითხებზე იმსჯელეს.
"თურქეთი საქართველოსთვის პირველი სავაჭრო-ეკონომიკური პარტნიორია, ამიტომ მნიშვნელოვანია, თანამშრომლობა ჩვენს ქვეყნებს შორის იყოს ორმხრივად სასარგებლო. არის გარკვეული ტიპის ბარიერები, მათ შორის, თურქეთის ბაზარზე ქართული პროდუქციისთვის. ელჩთან ვისაუბრეთ იმის თაობაზე, რომ კოლეგები საქართველოს მთავრობის მხრიდან, ისე როგორც თურქული მხარე, გააგრძელებენ მოლაპარაკებებს, რათა ქართული პროდუქციის შეღწევადობა თურქეთის ბაზარზე გაიზარდოს. ამავე დროს, საქართველო თურქეთისთვის მნიშვნელოვანი სატრანზიტო ქვეყანაა და ვიმსჯელეთ ამ კუთხით დღეს არებულ ვითარებაზე და იმ ბარიერებზე, რომელიც ჯერ კიდევ არსებობს. ერთ-ერთი ასეთი ბარიერი საგადასახადო კანონმდებლობაში ხშირი ცვლილებებია, რომელზედაც არათუ თურქებს, არამედ ქართველებსაც ხშირად ხელი არ მიუწვდებოდათ", - განაცხადა ფინანსთა მინისტრმა.
მისი განცხადებით, მომავალში ყველა ეს პროცედურა ღია და ხელმისაწვდომი იქნება როგორც ქართველი მეწარმეებისთვის, ისე უცხოელი პარტნიორებისთვის.
"ჩვენს ქვეყნებს შორის ურთიერთობა, შეიძლება ითქვას, სამაგალითოა რეგიონისთვის. მიუხედავად იმისა, რომ თურქეთი საქართველოსთვის პირველი სავაჭრო პარტნიორია, ეს არ ნიშნავს იმას, რომ ყველაზე მაღალ დონეს მივაღწიეთ ურთიერთობებში. ჩვენი სურვილია, კიდევ უფრო გააქტიურდეს ბიზნესკავშირები ორ ქვეყანას შორის. იმედი გვაქვს, მომავალში თანამშრომლობა საქართველოსა და თურქეთს შორის უფრო გააქტიურდება", - განაცხადა თურქეთის ელჩმა.
შეხვედრაზე მხარეებმა ისაუბრეს საბაჟო სფეროში პარტნიორობისა და მისი შემდგომი განვითარების შესახებ.
