აჭარის მთავრობის თავმჯდომარემ არჩილ ხაბაძემ აჭარის სოფლის მეურნეობის და ფინანსთა და ეკონომიკის მინისტრებთან ერთად სამუშაო შეხვედრა გამართა ქობულეთის ციტრუსის გადამამუშავებელი საწარმოს ხელმძღვანელებთან.
შეხვედრაზე საუბარი შეეხო მოსახლეობის მხრიდან ციტრუსის ჩაბარების პროცესში წარმოქმნილი ხარვეზების ერთობლივი ძალებით აღმოფხვრას. მთავრობის თავმჯდომარემ მეციტრუსეებისთვის არასტანდარტული მანდარინის ხელსაყრელ ფასად რეალიზაციისთვის მოლაპარაკებები აწარმოა. არჩილ ხაბაძის განცხადებით მთავრობის ინიციატივით ციტრუსის გადამამუშავებელი კომპანიები არასტანდარტულ მანდარინს 20 თეთრად შეისყიდიან, აქედან 8 თეთრით მათ მთავრობა დააფინანსებს დანარჩენ 12 თეთრს კი კომპანია გადაიხდის. სუბსიდირებული თანხის ჩარიცხვა კომპანიისთვის ურთიერთშეთანხმების შემდეგ დადგენილ ვადებში მოხდება.
„ბოლო ათი დღის განმავლობაში ვაწარმოებდით მოლაპარაკებებს ქობულეთის ციტრუსის მიმღებ და გადამამუშავებელ კომპანიის ხელმძღვანელებთან, დღეს შემაჯამებელი შეხვედრა გვქონდა და შევიმუშავეთ კონკრეტული გეგმა. ამ ეტაპზე ციტრუსის რეალიზაცია მოხდება ოთხ ქვეყანაში. რაც შეეხება ციტრუსის რეალიზაციის დროს განბაჟების თანხის განახევრებას, ამ საკითხზე არა მარტო ადგილობრივი მთავრობა, არამედ სავაჭრო-სამრეწველო პალატა, და საგარეო საქმეთა სამინისტროც მუშაობდა"- განაცხადა არჩილ ხაბაძემ.
